Канон Чудотворцу Николаю
Песнь 1
Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть: препрославленный Господь славно бо прославися.
Припев: Святителю отче Николае, моли Бога о нас.
Венценосец престолу Христову, премудре Николае, предстоя со Ангельскими воинствы, просвещение ми даруй, озаряющее души моея омрачение, яко да восхвалю, радуяся, твою, всеблаженне, память.
Припев: Святителю отче Николае, моли Бога о нас.
Прославляяй вся Господь Того славящия, тя верным прибежище даде, напастей избавляюща притекающия к твоему крову, Николае, и призывающия тя верою и любовию, преславне.
Припев: Пресвятая Богородице, спаси нас
Богородичен: Сравнитися желание ми вложив змий вселукавый Содетелю, яко пленника, восхити. Тобою же, Всечистая, воззван бых, обожився истиннейше: Ты бо, о, Богомати, мене обожившаго родила еси.
Песнь 3
Ирмос: Процвела есть пустыня, яко крин, Господи, языческая неплодяшая, Церковь пришествием Твоим, в нейже утвердися мое сердце.
Припев: Святителю отче Николае, моли Бога о нас.
Николае блаженне, Владыки искренний ученик ты быв, спасаеши к тебе притекающия от лютых бед и смерти горькия.
Припев: Святителю отче Николае, моли Бога о нас.
Очисти рабы Твоя, грехов оставление, яко благ, даруя, Николая, Твоего угодника, яже к Тебе ходатайствы, Многомилостиве.
Припев: Пресвятая Богородице, спаси нас
Богородичен: Утоли смущение души моея, Пречистая, и жизнь окорми, Всесвятая, Бога рождшая, в Немже утвердися сердце мое.
Песнь 4
Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.
Припев: Святителю отче Николае, моли Бога о нас.
Приближився чисте зарям духовным, светоносец был еси, мира просвещая концы, всем предстательствуя и вся спасая верою, к тебе притекающия.
Припев: Святителю отче Николае, моли Бога о нас.
Избавляя от смерти, яко явился еси первее, Николае, юноши, преподобне. Тако и ныне мя спаси от всякаго обстояния, и напастей, и бед, всеблаженне.
Припев: Святителю отче Николае, моли Бога о нас.
Облистал еси добродетелей сияньми, всеблаженне, подражатель преизряднейший Твоего Владыки быв, спасаеши же, призываемь, благоговением и любовию тя славящия.
Припев: Пресвятая Богородице, спаси нас
Богородичен: Найде на Тя Владыка твари воплощаемь, и спасая, яко благоутробен, всего мя человека: темже, вернии, Богородицу Тя славим.
Песнь 5
Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим, иного бо, разве Тебе, Бога не знаю.
Припев: Святителю отче Николае, моли Бога о нас.
Боголепным житием, треблаженне, просвещаемь, осужденных неправедным изречением умрети, представ, избавил еси, Владыце Христу зовущия: иного бо, разве Тебе, Бога не знаем.
Припев: Святителю отче Николае, моли Бога о нас.
На Небесех присносущную славу ныне зря, и неизглаголанныя и Божественныя зари светлейшими наслаждаяся сиянии, покрый мя предстательством твоим, преподобне, угодниче Христов всечестне.
Припев: Пресвятая Богородице, спаси нас
Богородичен: Да Твой взыщеши образ, погребенный страстьми, Спасе, Небесных утаився сил, воплощся из Девы, явился еси Тебе зовущим: иного, разве Тебе, Бога не знаем.
Песнь 6
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Припев: Святителю отче Николае, моли Бога о нас.
Иже победы, Николае, венец на твоем версе достойно положися, яко победитель убо изряднейший тя призывающия спаси.
Припев: Святителю отче Николае, моли Бога о нас.
Умерщвлена мя, блаженне, прегрешеньми и страстей треволненьми погружаема, явився, спаси ко пристанищу Божественныя воли.
Припев: Пресвятая Богородице, спаси нас
Богородичен: На Тя надежды возложих, Мати Приснодево, спасения моего и Тя предстательницу полагаю жизни, тверду же и непоколебиму.
Кондак глас 3
В Мирех, святе, священнодействитель показался еси, Христово бо, преподобне, Евангелие исполнив, положил еси душу твою о людех твоих и спасл еси неповинныя от смерти. Сего ради освятился еси, яко великий таинник Божия благодати. Икос
Воспоим ныне святителя песньми, мирским людем пастыря и учителя, да молитвами его просветимся: се бо явися чист весь, нетленен духом, Христу принося жертву непорочну, чисту, Богу благоприятну, яко святитель, очищен и душею и телом, темже сый истинно Церкве предстатель и поборник сея, яко великий таинник Божия благодати.
Песнь 7
Ирмос: Образу златому, на поле Деире служиму, трие Твои отроцы небрегоша безбожнаго веления, посреде же огня ввержени, орошаеми, пояху: благословен еси, Боже отец наших.
Припев: Святителю отче Николае, моли Бога о нас.
Острому искушению впадох, люте пострекаем, и ко вратом ада приближихся, скорбьми поражаем, спаси мя молитвами твоими, блаженне, и возстави, поюща: благословен еси, Боже отец наших.
Припев: Святителю отче Николае, моли Бога о нас.
Незаходимаго света невещественными лучами облистаем, сущия во тьме скорбей озлобленныя исхити и к просвещению веселия настави, поющия: благословен еси, Боже отец наших.
Припев: Пресвятая Богородице, спаси нас
Богородичен: Моли Христа, Сына Твоего и Бога, Дево Богородительнице, проданныя лютыми прегрешеньми и лестьми змииными кровию Его честною избавитися, поющим: благословен еси, Боже отец наших.
Песнь 8
Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа и превозносите во вся веки.
Припев: Святителю отче Николае, моли Бога о нас.
Яко благ и сострадателен во глубине напастей люте содержимыя свободи, блаженне Николае, от содержащих лютых, разрешение подая молитвами твоими яже ко Спасу Христу, священнотаинниче.
Припев: Святителю отче Николае, моли Бога о нас.
Тайновождь сущих паче ума, святых служитель и Небесных сый, Богомудре, архиерей же верен, прегрешений оставления проси от Спаса нашего, священноявленне.
Припев: Пресвятая Богородице, спаси нас
Богородичен: Изнемогает мой ныне ум, во глубину впад безчестия, яко отвсюду различными объят есмь злыми; но Ты, Дево, исцели, безстрастия светом одевающи.
Песнь 9
Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.
Припев: Святителю отче Николае, моли Бога о нас.
Свещами благодати, Богомудре, просвещаемь, и светильник благочестия яве был еси, сущия в напастех спасаеши, и сущия во глубине морстей избавляеши, и питаеши алчущия преславно, всеблаженне.
Припев: Святителю отче Николае, моли Бога о нас.
Иже в рай сладости ныне водворяяся и неизреченную славу ясно зря, от Небесных круг певцы твоя назираеши, от страстей избавляя, Богоносе всеблаженне.
Припев: Пресвятая Богородице, спаси нас
Богородичен: Премудрость, и Силу, и Слово Ипостасное Отчее, Богомати Чистая, родила еси, от Твоих пречистых кровей свой храм приимшую и Сему по соединению соединившую нераздельно.
Светилен
Великаго архипастыря и иерарха вси, председателя Мирликийскаго Николая восхвалим: многи бо мужи спасе, неправедно умрети имущия, и царю является со Авлавием во сне, реша неправедный суд.
Поделиться:
Канон первый из службы на перенесение мощей святителя Николая из Мир Ликийских в Бари, 9/22 мая
Глас 8-й:
Песнь 1
Ирмос
:
Песнь возслем, людие, чудному Богу нашему, свободившему Израиля от работы, песнь победную поюще и вопиюще: поим Тебе, единому Владыце.
Припев:
Святителю отче Николае, моли Бога о нас
Песнь устен моих приими, благодетелю Христе, и уясни ми язык, не поминая многих моих грехов, да воспою честное житие Твоего святителя в память перенесения мощей его.
Чудотворный дар прием и терпения венцы, святительством украшаяся, Богу помолися, отче, прегрешений прощение даровати нам, славящим твое пренесение.
Слава: Пастырь Христова стада, отче, иным овцам посылаешися, к латинскому языку, да вся удивиши чудесы твоими и ко Христу приведеши, блаженне, Емуже и о нас молися непрестанно.
И ныне, Богородичен: Далече бывше иногда, язычестии народи рождеством Твоим, Богородице, к Богу приближихомся: Ты бо мене обожившаго породила еси и древния клятвы свободшаго Своею кровию.
Катавасия: Моли Бога о нас, святителю отче Николае, яко мы усердно к Тебе прибегаем, скорому помощнику и молитвеннику о душах наших.
* или иная положенная в читаемое время катавасия
Песнь 3
Ирмос: Небеснаго круга верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
Припев:
Святителю отче Николае, моли Бога о нас
Незлобивый нравом и кроткий образом, житие имея ангельское, Богоблаженне Николае, не престай о нас моляся единому Человеколюбцу.
Кий град, блаженне, не имеет тебе помощника? Кая ли душа не призывает твоего имене? Или коего места не присещаеши духом, твоими чудесы удивляя вся, Николае?
Слава: Барский убо град прият тело твое, но дух твой в Вышнем Иерусалиме, идеже ликуеши со пророки, и апостолы, и святители купно, моляся о нас единому Человеколюбцу.
И ныне, Богородичен: Просвещение ми испроси, пречистая Владычице, омраченному грехи многими, порождшая Свет всему миру, и страстную мглу далече отжени, едина Богоблаженная.
Катавасия: Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.
Господи, помилуй. (трижды)
Седален, глас 1
Освящ себе житием совершенным, явился еси святитель Бога Вышняго, от Негоже укрепляемь, еретичествующих уста заградил еси. Тем твое пренесение светло празднуем, Христа Бога величающе.
Слава, и ныне, Богородичен
Безневестная чистая Богородице Дево, едина верных предстательство и покрове, бед, и скорбей, и лютых обстояний всех избави, на Тя упование, Отроковице, имущих, и души наша спаси Божественными мольбами Твоими.
Песнь 4
Ирмос: Всел еси на кони, апостолы Твоя, Господи, и приял еси рукама Твоима узды их, и спасение бысть еждение Твое верно поющим: слава силе Твоей, Господи.
Припев:
Святителю отче Николае, моли Бога о нас
Светом Вышняго озаряемь, святителю, мое сердце просвети и тьму греховную отжени, да радуяся, пою твое святое пренесение.
Возступль на лествицу добродетелей, блаженне, чудотворец явился еси по всей земли, Николае, и сего ради от Мир барстии людие приемлют святыя мощи твоя.
Слава: Иереи вернии о тебе хвалятся, и людие христолюбивии призывают тя, во бранех помощника, и мы, недостойнии, подвизаем тя к Богу за ны молитися, Николае.
И ныне, Богородичен: Чины ангельския удивляет, Богородице, тайны Твоея глубина, бесы же смущает Твоя икона. Ейже мы кланяемся, чтуще Тя, Божию Матерь.
Катавасия: Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.
Песнь 5
Ирмос: Мрак души моея разжени, Светодавче Христе Боже, началородную тьму изгнав бездны, и даруй ми свет повелений Твоих, Слове, да, утренюя, славлю Тя.
Припев:
Святителю отче Николае, моли Бога о нас
В Мирех престол имел еси, в Бар тело преселил еси, и духом на небеси пребываеши, святителю Николае, со апостолы, яко преемник, с нимиже о нас моли, поющих твое пренесение.
Всех христиан надеждо, и обидимых велий заступниче, и болящих целителю, печальных утешителю и к Богу от человек ходатаю, отечеству нашему мир испроси и спасай нас от поганых нахождения.
Слава: Погруженную душу мою многими страстьми, Николае, умерщвленную грехопадением, оживи твоими молитвами и направи на покаяние, да с верными всеми твое славлю пренесение.
И ныне, Богородичен: Егоже тьмы ангельския и серафимская множества ужасаются и разумная тварь трепещет, Того яко Младенца, Дево, питаеши, Егоже образно на руку Твоею видяще, всегда покланяемся.
Катавасия: Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.
Песнь 6
Ирмос: Якоже пророка избавил еси из глубины преисподния, Христе Боже, и мене от грехов моих избави, яко Человеколюбец, и управи живот мой, молюся.
Припев:
Святителю отче Николае, моли Бога о нас
Яко от окрина от Божественныя Твоея церкве нескудно приемлем здравие телесем и душам очищение, святителю Николае, чудеса бо точиши благодатию несомненною верою уповающим на тя.
От напастей различных, и от бед лютых, и скорбей, одержащих ны, и от различных злых, отче, яко Христов угодник преславный, избави рабы твоя, достодолжно чтущия твое святое пренесение.
Слава: Греховным мразом истерп и житейским ветром пореваемь, яко другое солнце, отче, подобие твоего образа видев, твоими молитвами да согреюся, служителю Христов Николае.
И ныне, Богородичен: Земных ум небесныя тайны не увесть, ни тварь Творца разума домыслится: преходит бо ум человеч от Девы рождество Господне. Ейже молящеся верою, грехов прощение приимем.
Катавасия: Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.
Господи, помилуй. (Трижды.)
Слава, и ныне.
Кондак, глас 3
Взыде, яко звезда, от востока до запада твоя мощи, святителю Николае, море же освятися шествием твоим, и град Барский приемлет тобою благодать: нас бо деля явился еси чудотворец изящный, предивный и милостивый.
Икос
Воспоим ныне святителя песньми, мирским людем пастыря и учителя, да молитвами его просветимся: сей бо явися чист весь, нетленен духом, Христу принося жертву непорочну, чисту, Богу благоприятну, яко святитель, очищен душею и телом. Темже сый истинно Церкви предстатель и поборник сея и чудотворец изящен, предивен и милостив.
Песнь 7
Ирмос: На поле Деире иногда мучитель пещь постави на мучение Богоносных, в нейже три отроки песнословяху единаго Бога, троично воспеваху, глаголюще: отцев Боже, благословен еси.
Припев:
Святителю отче Николае, моли Бога о нас
Днесь радуются Ангели Божии, рыдает же демонское множество: спасл бо еси люди от напасти и отгнал еси духи темныя. Тем достойно одолевый нарицаешися. Сего ради вопием Господеви: отец наших Боже, благословен еси.
Одержимии печалию немощи, различными недуги утруждени, с верою к раце твоей влекутся и, получивше твою милость, быстрообразно отходят, радостно Господеви поюще: отец наших Боже, благословен еси.
Слава: Предстоят ти, блаженне, собори правоверных людей, и хвалятся о тебе церковнии учители, прославляют же тя цари, яко заступника. Мы же ти молимся, спаси ны, Николае, поющия Господеви: отец наших Боже, благословен еси.
И ныне, Богородичен: О, како Спаса моего воспою, Егоже трепетно хвалят Ангели? Но Ты, Мати, настави мя и милосердие Сыновнее благоутробием Твоим понуди помиловати ны, на Тя уповающия, яко Ты, за ны молящи Его, от муки избавиши.
Катавасия: Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.
Песнь 8
Ирмос: Ангели и небеса, на престоле славы седящаго и яко Бога непрестанно славимаго благословите, пойте и превозносите Его во веки.
Припев:
Святителю отче Николае, моли Бога о нас
Ангели небес яко служителя тя восприемлют, пророцы и апостоли яко клеврета сретают, Сам Господь тебе восприемлет, мы же, грешнии, милости просим.
Велика власть от Бога вдана ти есть, Николае: море повинуется, воздух слушает, и языцы покаряются, видяще преславная твоя чудеса.
Слава: Новому Израилю, христианскому народу, Спасе, славнейши Моисея показал еси Твоего святителя Николая, от всех зол нас избавляюща.
И ныне, Богородичен: Очищение грехов яко Мати Божия испроси и руку ми простри, Госпоже, погруженному во глубине нечаяния, да, надеждею востав, превозношаю Тя во веки вся.
Катавасия: Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.
Песнь 9
Ирмос: Благословен Господь Бог Израилев, воздвигнувый рог спасения нам в дому Давидове, отрока Своего, в нихже посети нас Восток с высоты и направил ны есть на путь мира.
Припев:
Святителю отче Николае, моли Бога о нас
Благословен Господь Бог наш, яко прослави святителя в странах, чудес струи испущающа, в Мирех и в латинех вся исцеляюща и в России милостивно посещающа.
Честным сном уснул еси и тело в Бар пользы ради пустил еси, неусыпный быв заступник всем, верою призывающим тя, молитвами твоими, Николае.
Слава: Благословен небесе и земли Творец, Бог Вседержитель, Отец безначальный и всесильный, и Сын прежде век, от недр отрыгновенное Слово, Имже вся быша, яже о нас, и Дух исходяй Святый, Троице Святая, слава Тебе.
И ныне, Богородичен: Извитием словес по достоянию Тя похвалити не достизаю, небесных сил пребольшу и твари всея честнейшу, Бога и Творца порождшую плотию. Егоже моли, Богородице, да помилует ны в день судный.
Катавасия: Моли Бога о нас, святителю отче Николае, яко мы усердно к тебе прибегаем, скорому помощнику и молитвеннику о душах наших.
