Акафист иконе Божией Матери «Державная»

Кондак 1

Избранней от всех родов Заступнице рода христианскаго, покровом Своея благости покрывающей страну нашу православную, благодарственная пения приносим Ти, Владычице, о явлении нам чудныя иконы Твоея «Державныя». Ты же, яко Всемилостивая Заступница всех с верою к Тебе притекающих, от всяких нас бед свободи, да зовем Ти:

Радуйся, Мати Божия Державная, Заступнице усердная рода христианскаго.

Икос 1

Ангелом радость приимшая, благоволила еси, Владычице, возвестити старице благочестивей радость о явлении иконы Твоея честныя «Державныя», юже и обретше по указанию Твоему, яко знамение милости Божией к нам, грешным, благодарственно вопием Ти сице:

Радуйся, воли Господней тайны нам открывающая; радуйся, гнев Его праведный, на ны движимый, умягчающая.

Радуйся, зловерия нечестивых обличение; радуйся, гордыни их низложение.

Радуйся, веры христианския утверждение; радуйся, почитания святых икон освящение.

Радуйся, тихое пристанище спасения душ наших; радуйся, Всемилостивая Заступнице наша у престола Святыя Троицы.

Радуйся, от бед и скорбей наше избавление; радуйся, Церкве Православныя утверждение.

Радуйся, Звездо Невечерняго Света, нас озаряющая; радуйся, Матерь Света, всех просвещающая.

Радуйся, Мати Божия Державная, Заступнице усердная рода христианского.

Кондак 2

Видящи, Всенепорочная, с высоты небеснаго жилища Своего, идеже с Сыном Твоим во славе пребываеши, скорбь верных рабов Твоих, яко гневнаго ради Божия посещения вера Христова поругаема бывает нечестивым зловерием, благоволила еси явити нам икону Твою «Державную», да вси христолюбивии людие усердно молятся пред нею, вопиюще Богу: Аллилуиа.

Икос 2

Разуму нашему просвещение свыше исходатайствуй, Пресвятая Богородице, да познаем, что есть воля Божия благая, угодная и совершенная, и сердце направи, еже со усердием творити ю, Тебе же, Всемилостивая Заступнице, непрестанными гласы восхваляти:

Радуйся, явлением честныя иконы Твоея тьму лютых обстояний от нас отгоняющая; радуйся, лучами чудес всех просвещающая.

Радуйся, душевными и телесными очами ослепших прозрение; радуйся, омраченных смыслов просвещение.

Радуйся, всех христиан вожделенная Помощнице; радуйся, всех уповающих на Тя непостыдная надеждо.

Радуйся, вдов и сирот надежный покрове; радуйся, алчущих Питательнице.

Радуйся, духовных сокровищ Подательнице; радуйся, богомудрых премудрая доброто.

Радуйся, пресветлая, Божественная красото; радуйся, обоняние Христова благоухания.

Радуйся, Мати Божия Державная, Заступнице усердная рода христианскаго.

Кондак 3

Силу Божественныя благодати даруй нам, Пресвятая Богородице, во еже неуклонно и непреткновенно ходити нам спасительным путем Христовых заповедей, сердцем же и устами непрестанно воспевати Всемогущему Богу: Аллилуиа.

Икос З

Имуще Тя, Богоизбранная Заступнице рода христианскаго, яко зарю светлую, просвещающую душ наших темноту и разгоняющую мрак сердечнаго неведения нашего, припадаем к честней иконе Твоей «Державней» и с умилением вопием Ти сице:

Радуйся, сохраняти и спасати всех призывающих Тя обещавшая; радуйся, прославляющих Тя прославляющая.

Радуйся, к Сыну Твоему и Богу нашему молитвы верных приносящая; радуйся, благодать Твою иконам Твоим честным даровавшая.

Радуйся, всю вселенную лучами Твоея благодати озарившая; радуйся, премудрости Божия приятелище.

Радуйся, Божественныя благодати Подательнице; радуйся, яко Тобою от вечныя смерти свобождаемся.

Радуйся, яко Тобою безконечныя жизни сподобляемся; радуйся, честнейшая Херувим и славнейшая Серафим.

Радуйся, Матерь Света и Царице Небесная; радуйся, Владычице, Всемилостивая за нас пред Богом Заступнице.

Радуйся, Мати Божия Державная, Заступнице усердная рода христианскаго.

Кондак 4

Буря житейскаго моря сокрушает духовный корабль наш волнами мирских попечений, и мир убогих душ наших мятется. И где обрящем тихое пристанище спасения? Токмо на Тя возлагаем надежду, Владычице; имущи бо державу непобедимую, от всяких бед, глада, скорбей и болезней избави нас, верно вопиющих Богу: Аллилуиа.

Икос 4

Слышавше православнии людие повеление Твое, Владычице, молитися пред образом Твоим «Державным», со умилением сердечным прибегают к Твоему всесильному заступлению у престола Всемогущаго Бога и благоговейно вопиют Ти сице:

Радуйся, горняго мира украшение; радуйся, дольняго мира заступление.

Радуйся, Дщи благословенная Отца Небеснаго; радуйся, Родительнице неискусомужная Сына Предвечнаго.

Радуйся, демонския полки побеждающая; радуйся, враги спасения человеческаго посрамляющая.

Радуйся, яко волею Твоею сокрушаются еретические главы; радуйся, яко вернии Тобою сподобляются славы.

Радуйся, телес наших безмездная Целительнице; радуйся, душ наших к Царствию горнему Путеводительнице.

Радуйся, яко сотвори Тебе величие Сильный; радуйся, яко призре на смирение Твое Господь.

Радуйся, Мати Божия Державная, Заступнице усердная рода христианскаго.

Кондак 5

Боготечная звезда явися нам, Владычице, честная Твоя икона «Державная», страну Российскую всю обтекающая и лучами чудес Твоих осиявающая всех блуждающих по морю страстнаго жития, мрак печалей и мглу всяческих недуг и скорбей прогоняющая и наставляющая на путь спасения с верою к Тебе притекающих и вопиющих Богу: Аллилуиа.

Икос 5

В дни лютых скорбей и злых обстояний явила еси нам, Владычице, велию милость обретением честныя иконы Твоея «Державныя», да вси, с верою молящиися пред нею, приимут здравие и душ спасение. Сего ради и мы, прославляюще Твое милосердие неизреченное, усердно вопием Ти сице:

Радуйся, светило незаходимое, светом истиннаго богопознания нас просвещающее; радуйся, Вратарнице, двери райския верным отверзающая.

Радуйся, многотекущая река Божественныя благодати; радуйся, неистощимый источниче святыни.

Радуйся, ко благочестию наша Наставнице; радуйся, душ наших освящение.

Радуйся, кающихся грешников с Богом примирение; радуйся, добрыя обеты приемлющая.

Радуйся, благим намерениям способствующая; радуйся, злыя начинания разрушающая.

Радуйся, вражия козни расторгающая; радуйся, скорая человеком Помощнице.

Радуйся, Мати Божия Державная, Заступнице усердная рода христианскаго.

Кондак 6

Воспеваем Твое милосердие досточудное и многое к нам снисхождение, Пресвятая Богородице, не престаеши бо молитися о нас, грешных, Сыну Твоему и Богу нашему, еже отвратити гнев Его праведный, на ны движимый, и помиловати всех, верно вопиющих Богу: Аллилуиа.

Икос 6

Возсиявает в души наша, омраченныя скорбию и унынием от множества согрешений, свет благодатнаго утешения, и сердце наше исполняется веселия и радости, егда непрестанными Твоими, Владычице, вразумлениями возбуждаеши нас вопити к щедрому Богу, да милостив будет и простит нам прегрешения наша. Не премолчи убо, Владычице, наставляющи и вразумляющи нас, зовущих Ти сице:

Радуйся, в скорбех и болезнех долготерпению нас научающая; радуйся, вся помышления наша к распятому за грехи мира Спасителю устремляющая.

Радуйся, страдания Его и крестную смерть в памяти нашей обновляющая; радуйся, правосудием Божиим к ожесточенным и нераскаянным нас устрашающая.

Радуйся, ожиданием будущих небесных благ нас услаждающая; радуйся, к наследству нетленному и вечному нас приводящая.

Радуйся, наследниками Царствия Божия нас сотворяющая; радуйся, трапезо святая, хлебом жизни нас питающая.

Радуйся, маслино благоплодная, елеем милости сердца умягчающая; радуйся, яко молитвою пред иконою Твоею приемлем духовное утешение.

Радуйся, яко сердцам нашим даруеши благодатное сокрушение; радуйся, яко благостынею Твоею угашаеши в нас огнь нечестия.

Радуйся, Мати Божия Державная, Заступнице усердная рода христианского.

Кондак 7

Хотяй всем человеком спастися и в разум познания истины прийти, премилосердный Господь и Создатель наш посла во дни гневнаго посещения Своего ангела пресветла в новоявленнем образе Твоем «Державнем», да вси, с верою молящиися пред ним, приимут помощь и заступление Твое всесильное и радостно вопиют Всемогущему Богу: Аллилуиа.

Икос 7

Новую показа милость всех Творец и Владыка наш Господь, егда положи во гневе Своем наказати род человеческий огнем, мечем, гладом и болезньми, сотвори сие наказание для многих человеков ко вразумлению и исправлению во спасение душ. Сего ради и мы, Владычице, припадающе к Пречистому образу Твоему «Державному», усердно молим Тя: не даждь нам погибнути до конца, но милосердия двери отверзи нам, вопиющим Ти сице:

Радуйся, неприступнаго Божества селение; радуйся, ангельское непрестающее удивление.

Радуйся, рабов Божиих тайное вразумление; радуйся, Заступнице всех сущих в скорбех и болезнех.

Радуйся, благодатное безстрастие ищущим его подающая; радуйся, всех в чистоте целомудрия живущих зело любящая.

Радуйся, пристанище небурное подвижников благочестия; радуйся, гневом Божиим вразумляющая сынов нечестия.

Радуйся, безмолвствующих сладкая Собеседнице; радуйся, отшельников Христа ради крепкое упование.

Радуйся, постников Божественное радование; радуйся, пустынножителей тихое веселие.

Радуйся, Мати Божия Державная, Заступнице усердная рода христианскаго.

Кондак 8

Странни и пришельцы есмы на земли сей: житие бо наше суетно и маловременно есть. Мы же смерти безвестное во ум никогдаже приемлем, ни помышляем о Страшнем судищи Христове, в немже имамы праведному Судии предстати и дати ответ о всяком же деле и слове. Темже молим Тя, Владычице: возбуди нас скоро от сна греховнаго, да не постигнет нас час смерти неисправленных и да сподобимся Твоим ходатайством получити беззакониям нашим прощение и во гласе радования воспевати Христу Богу: Аллилуиа.

Икос 8

Вся бывши горе, к небесным взята еси и земных не оставляеши, Пресвятая Богородице, священным Твоим предстательством: имаши бо дерзновение к Сыну Твоему и Богу нашему. Темже утверди, Владычице, в мире глубоце страну нашу православную и вся полезная даруй рабом Твоим, да величающе воспеваем Ти тако:

Радуйся, умным очесем нашим горький и страшный час смертный представляющая; радуйся, на кийждо день, аки уже на последний жития нашего, взирати нас научающая.

Радуйся, любити мир и яже в мире нам воспрещающая; радуйся, пристрастие к тленному богатству из сердц наших искореняющая.

Радуйся, вся блага земная быти привременна и скоропреходяща нам показующая; радуйся, славы человечи, аки тени преходящия, искати нам возбраняющая.

Радуйся, яко сладчайшее имя Господа Иисуса Христа устами непрестанно произносити и во уме держати нас побуждаеши; радуйся, яко от празднословия, многоглаголания, паче же от кощунства нас удержаваеши.

Радуйся, яко воздержанию в пищи и питии приобучити нас печешися; радуйся, яко Твое за нас ходатайство сильно есть пред Богом, еже не вверженным нам быти во тьму кромешнюю.

Радуйся, яко присно внушаеши нам омывати грехи своя слезами покаяния, да избавимся геенны адския; радуйся, яко побуждаеши нас день и нощь молитися, да не посланы будем со демоны мучитися.

Радуйся, Мати Божия Державная, Заступнице усердная рода христианскаго.

Кондак 9

Всякое естество ангельское удивися делу Твоего милосердия, Господи, яко даровал еси нам толико твердую и теплую Заступницу роду христианскому во дни гневнаго Своего посещения, нам невидимо сопребывающую, слышащую же Тебе поющих: Аллилуиа.

Икос 9

Витии многовещаннии, непросвещеннии светом истиннаго богопознания, поклонишася златому тельцу. По слову же апостола, всяк любостяжатель есть идолослужитель. Сего ради Божие гневное посещение всему миру зряще, и мы, грешнии, смиренно молим Тя, Владычице: умилостиви Создателя, да потщится гнев Свой праведный преложити на милость и помиловати нас, вопиющих Ти сице:

Радуйся, яко Твоея помощи и заступления никогдаже нас лишаеши; радуйся, яко ум наш, омраченный небрежением, светлым Твоим покровом озаряеши.

Радуйся, яко Тобою от страстей телесных избавляемся; радуйся, яко Тобою сладостей духовных исполняемся.

Радуйся, твердое Православия укрепление; радуйся, честное Пресвятыя Троицы носило и похваление.

Радуйся, и во временней жизни полезная нам подающая; радуйся, душевныя раны наша елеем спасительным умащающая.

Радуйся, яко из рова беззаконий наших рукою Твоея помощи нас исхищаеши; радуйся, яко греховный сон душевредныя нашея лености отрясаеши.

Радуйся, душевное умиление и сердечное сокрушение в нас раждающая; радуйся, яко твориши всем спастися, в державный покров Твой прибегающим.

Радуйся, Мати Божия Державная, Заступнице усердная рода христианскаго.

Кондак 10

Спасти хотя многия люди от обдержащих их скорбей и болезней и веру их утвердити во всесильное заступление Твое, Владычице, даровала еси нам изображение честныя иконы Твоея «Державныя», да вси, видяще являемую Тобою милость, вопиют со умилением Богу: Аллилуиа.

Икос 10

Стена явилася еси, Богородице Дево, Российстей стране честными Твоими иконами, изливающи чудеса во бранех и осеняющи благодатною помощию Твоею христолюбивых воинов. Под державным бо покровом Твоея благости Российская страна созидашеся, и врата адова не одолеша Православныя Церкве Христовы. Сего ради припадающе к честней иконе Твоей «Державней», радостно вопием Ти сице:

Радуйся, Российския страны покрове и утверждение; радуйся, от нашествия иноплеменных избавление.

Радуйся, сущих в пленении свобождение; радуйся, от глада и болезней наше спасение.

Радуйся, саде земли обетования; радуйся, цвете Божественнаго саждения.

Радуйся, лозо добродетельная винограда Христова; радуйся, древо чудоточное рая Иисусова.

Радуйся, жилище и дом Христа Бога нашего; радуйся, вместилище неизреченныя Его славы.

Радуйся, Владычице, Всемилостивая Подательнице щедрот; радуйся, яко много может молитва Твоя пред Сыном Твоим и Богом нашим.

Радуйся, Мати Божия Державная, Заступнице усердная рода христианскаго.

Кондак 11

Пение хвалебное и благодарственное приносим Ти, Владычице, под державным бо покровом Твоея благости пребываем в непостыдней надежде всесильнаго заступления Твоего за нас, грешных, и все упование наше на Тя возложивше, радостно вопием Богу: Аллилуиа.

Икос 11

Светильницы наши угасоша, елея же благих дел не имамы, во еже возжещи благодать Духа Святаго. И где обрящемся, окаяннии, сном греховным отягченнии, егда постигнет нас внезапу в полунощи час кончины нашея? Но да не услышим и мы, якоже юродивыя девы, грознаго гласа Жениха: не вем вас! Помози нам, Владычице, наполнити сосуды душ наших елеем благих дел, паче же милосердия и смирения, да благодарственно воспоем Ти сице:

Радуйся, яко воспоминанием грядущаго грознаго суда Божия от грехов нас отреваеши; радуйся, яко души наши, аки невесту, ко сретению прекраснаго Жениха Христа предуготовляти нас поучаеши.

Радуйся, яко возбуждаеши нас на всяк день же и час приносити Христу Богу молитвы, прошения и благодарения; радуйся, яко с мудрыми девами, душами праведных, внити в брачный чертог Сына Твоего и Бога нашего помогаеши.

Радуйся, яко в ризу непорочности и чистоты облещися нам способствуеши; радуйся, яко стати нам на Страшнем суде Христовом одесную Его ходатайствуеши.

Радуйся, яко благоутробие Божие о причастии нас лику избранных умоляеши; радуйся, яко ум наш, омраченный небрежением, светом Своим озаряеши.

Радуйся, яко голубину простоту и агнчу кротость стяжати нам приискренне желаеши; радуйся, яко самоотвержению и отречению от злыя нашея воли приобучити нас тщишися.

Радуйся, яко младенческое незлобие даровати нам способствуеши; радуйся, яко хладное сердце наше молитвами воспламеняти нам помогаеши.

Радуйся, Мати Божия Державная, Заступнице усердная рода христианскаго.

Кондак 12

Благодать прияла еси, Владычице, от Всемогущаго Господа Бога миловати благочестивых чад Церкве Христовы и вразумляти нечестивых сынов ея. Сего ради, притекающе под державный покров Твоея благости, усердно молим Тя, Владычице: избави нас от ухищрений духов злобы, разслабляющих наши душу и тело леностию и нерадением, и возбуди нас от сна греховнаго, да благодарственно вопием Богу: Аллилуиа.

Икос 12

Поюще Твоя чудеса, бывшая в древняя и настоящая времена, хвалим Тя, Владычице, яко живоносный источник благодати и неистощимую чудес реку, бездну бо милости и щедрот даровала еси роду христианскому явлением честных икон Твоих. Сего ради и мы, припадающе к честней иконе Твоей «Державней», со умилением вопием Ти сице:

Радуйся, Церкве Небесныя и земныя украшение; радуйся, девства честный покрове и ограждение.

Радуйся, светлое пророческое сбытие; радуйся, всехвальных апостолов восхваление.

Радуйся, честная похвало иереев благоговейных; радуйся, молние, неверных устрашающая.

Радуйся, славою чудес Твоих верных смыслы озаряющая; радуйся, печаль и скорбь нашу в радость претворяющая.

Радуйся, яко молиши Сына Твоего и Бога нашего всем нам спастися; радуйся, яко твориши милости всем в державный Твой покров притекающим.

Радуйся, Заступнице всех сущих в скорбех и болезнех; радуйся, всем с верою Тебе молящимся полезная дарующая.

Радуйся, Мати Божия Державная, Заступнице усердная рода христианскаго.

Кондак 13

О Всепетая Мати, Державная Владычице! Приими ныне сие малое моление наше и величия ради благости Твоея и неизреченных щедрот Твоих не помяни множества грехов наших, но исполни во благих прошения наша: даруй нам вся потребная к жизни и благочестию, избави нас от глада, болезней и печали, и Царствия Небеснаго наследники всех сотвори, верно вопиющих Богу: Аллилуиа.

Этот кондак читается трижды, затем 1-й икос «Ангелом радость приимшая…» и 1-й кондак «Избранней от всех родов …».

(После акафиста читается молитва)

Молитва пред иконой Божией Матери «Державная»

«О Державная Владычице, Пресвятая Богородице, на объятиих Своих держащая Содержащаго дланию всю вселенную, Царя Небеснаго! Благодарим Тя за неизреченное милосердие Твое, яко благоволила еси явити нам, грешным, сию святую чудотворную икону Твою во дни сии. Благодарим Тя, яко призрела еси с высоты святыя Своея на чад православных, и, яко солнце светлое, увеселяеши ныне изнемогшия от печали очеса наша пресладостным зрением державнаго образа Твоего! О Преблагословенная Матерь Божия, Державная Помощнице, Крепкая Заступнице, благодаряще Тя, со страхом и трепетом, яко раби непотребнии, мы припадаем, со умилением, с сокрушением сердечным, со слезами молим Тя: вкорени в сердцах всех нас правду, мир и радость о Дусе Святе, водвори в стране нашей тишину, благоденствие, безмятежие, любовь друг ко другу нелицемерную! Державою Твоею всесильною поддержи нас, слабых, малодушных, немощных, унылых, подкрепи, возстави! Яко да под державою Твоею всегда храними, поем, величаем и славим Тя, Державную Заступницу рода христианскаго во веки веков. Аминь.»

Акафист Пресвятой Богородице пред иконой «Державная»

А҆ка́ѳїстъ прест҃ѣ́й бг҃ро́дицѣ ꙗ҆вле́нїѧ ра́ди чꙋдотво́рныѧ є҆ѧ̀ і҆кѡ́ны держа́вныѧ.

Конда́къ а҃.

И҆збра́ннѣй ѿ всѣ́хъ родѡ́въ застꙋ́пницѣ ро́да хрⷭ҇тїа́нскагѡ, покро́вомъ своеѧ̀ бл҃гости покрыва́ющей странꙋ̀ на́шꙋ правосла́внꙋю, благода́рствєннаѧ пѣ̑нїѧ прино́симъ тѝ, влⷣчце, ѡ҆ ꙗ҆вле́нїи на́мъ чꙋ́дныѧ і҆кѡ́ны твоеѧ̀ держа́вныѧ. Ты́ же, ꙗ҆́кѡ всемлⷭ҇тиваѧ застꙋ́пница всѣ́хъ съ вѣ́рою къ тебѣ̀ притека́ющихъ, ѿ всѧ́кихъ на́съ бѣ́дъ свободѝ, да зове́мъ тѝ:

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

І҆́косъ а҃.

А҆́гг҃лѡмъ ра́дость прїи́мшаѧ, бл҃говоли́ла є҆сѝ, влⷣчце, возвѣсти́ти ста́рицѣ бл҃гочести́вѣй ра́дость ѡ҆ ꙗ҆вле́нїи і҆кѡ́ны твоеѧ̀ чⷭ҇тны́ѧ держа́вныѧ, ю҆́же и҆ ѡ҆брѣ́тше по ᲂу҆каза́нїю твоемꙋ̀, ꙗ҆́кѡ зна́менїе млⷭ҇ти бж҃їей къ на́мъ грѣ́шнымъ, благода́рственнѡ вопїе́мъ тѝ си́це:

Ра́дꙋйсѧ, во́ли гдⷭ҇ней та́йны на́мъ ѿкрыва́ющаѧ: ра́дꙋйсѧ, гнѣ́въ є҆гѡ̀ првⷣный, на ны̀ дви́жимый, ᲂу҆мѧгча́ющаѧ.

Ра́дꙋйсѧ, нечести́выхъ ѕловѣ́рїѧ ѡ҆бличе́нїе: ра́дꙋйсѧ, горды́ни и҆́хъ низложе́нїе.

Ра́дꙋйсѧ, вѣ́ры хрⷭ҇тїа́нскїѧ ᲂу҆твержде́нїе: ра́дꙋйсѧ, почита́нїѧ ст҃ы́хъ і҆кѡ́нъ ѡ҆сщ҃е́нїе.

Ра́дꙋйсѧ, ти́хое приста́нище сп҃се́нїѧ дꙋ́шъ на́шихъ: ра́дꙋйсѧ, всемлⷭ҇тиваѧ застꙋ́пнице на́ша ᲂу҆ прⷭ҇то́ла ст҃ы́ѧ трⷪ҇цы.

Ра́дꙋйсѧ, ѿ бѣ́дъ и҆ скорбе́й на́ше и҆збавле́нїе: ра́дꙋйсѧ, цр҃кве правосла́вныѧ ᲂу҆твержде́нїе.

Ра́дꙋйсѧ, ѕвѣздо̀ невече́рнѧгѡ свѣ́та, на́съ ѡ҆зарѧ́ющаѧ: ра́дꙋйсѧ, мт҃и свѣ́та, всѣ́хъ просвѣща́ющаѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ в҃.

Ви́дѧщи, всенепоро́чнаѧ, съ высоты̀ нбⷭ҇нагѡ жили́ща своегѡ̀, и҆дѣ́же съ сн҃омъ твои́мъ во сла́вѣ пребыва́еши, ско́рбь вѣ́рныхъ рабѡ́въ твои́хъ, ꙗ҆́кѡ гнѣ́внагѡ ра́ди бж҃їѧ посѣще́нїѧ вѣ́ра хрⷭ҇то́ва порꙋга́ема быва́етъ нечести́вымъ ѕловѣ́рїемъ, бл҃говоли́ла є҆сѝ ꙗ҆ви́ти на́мъ і҆кѡ́нꙋ твою̀ держа́внꙋю, да всѝ хрⷭ҇толюби́вїи лю́дїе ᲂу҆се́рднѡ мо́лѧтсѧ пред̾ не́ю, вѣ́рнѡ вопїю́ще бг҃ꙋ: А҆ллилꙋ́їа.

І҆́косъ в҃.

Ра́зꙋмꙋ на́шемꙋ просвѣще́нїе свы́ше и҆схода́тайствꙋй, прест҃а́ѧ бцⷣе, да позна́емъ, что́ є҆сть во́лѧ бж҃їѧ блага́ѧ, ᲂу҆го́днаѧ и҆ соверше́ннаѧ, и҆ се́рдце напра́ви, є҆́же со ᲂу҆се́рдїемъ твори́ти ю҆̀, тебе́ же, всеми́лостиваѧ застꙋ́пнице, непреста́нными гла́сы восхвалѧ́ти:

Ра́дꙋйсѧ, ꙗ҆вле́нїемъ честны́ѧ і҆кѡ́ны твоеѧ̀ тьмꙋ̀ лю́тыхъ ѡ҆бстоѧ́нїй ѿ на́съ ѿгонѧ́ющаѧ: ра́дꙋйсѧ, лꙋча́ми чꙋде́съ всѣ́хъ просвѣща́ющаѧ.

Ра́дꙋйсѧ, дꙋше́вными и҆ тѣле́сными ѻ҆чесы̑ ѡ҆слѣ́пшихъ прозрѣ́нїе: ра́дꙋйсѧ, ѡ҆мраче́нныхъ смы́слѡвъ просвѣще́нїе.

Ра́дꙋйсѧ, всѣ́хъ ᲂу҆пова́ющихъ на тѧ̀ непосты́днаѧ наде́ждо: ра́дꙋйсѧ, вдо́въ и҆ сиро́тъ наде́жный покро́ве.

Ра́дꙋйсѧ, а҆́лчꙋщихъ пита́тельнице: ра́дꙋйсѧ, дꙋхо́вныхъ сокро́вищъ пода́тельнице.

Ра́дꙋйсѧ, бг҃омꙋ́дрыхъ премꙋ́драѧ добро́то: ра́дꙋйсѧ, пресвѣ́тлаѧ, бж҃е́ственнаѧ красото̀.

Ра́дꙋйсѧ, цвѣ́те нетлѣ́нїѧ: ра́дꙋйсѧ, ѡ҆бонѧ́нїе хрⷭ҇то́ва бл҃гоꙋха́нїѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ г҃.

Си́лꙋ бжⷭ҇твенныѧ блгⷣти да́рꙋй на́мъ, прест҃а́ѧ бцⷣе, во є҆́же неꙋкло́ннѡ и҆ непреткнове́ннѡ ходи́ти на́мъ сп҃си́тельнымъ пꙋте́мъ хрⷭ҇то́выхъ за́повѣдей, се́рдцемъ же и҆ ᲂу҆сты̑ непреста́ннѡ воспѣва́ти всемогꙋ́щемꙋ бг҃ꙋ: А҆ллилꙋ́їа.

І҆́косъ г҃.

И҆мꙋ́ще тѧ̀, бг҃оизбра́ннаѧ застꙋ́пнице ро́да хрⷭ҇тїа́нскагѡ, ꙗ҆́кѡ зарю̀ свѣ́тлꙋю, просвѣща́ющꙋю дꙋ́шъ на́шихъ темнотꙋ̀ и҆ разгонѧ́ющꙋю мра́къ серде́чнагѡ невѣ́дѣнїѧ на́шегѡ, припа́даемъ къ чⷭ҇тнѣ́й і҆кѡ́нѣ твое́й держа́внѣй и҆ съ ᲂу҆миле́нїемъ вопїе́мъ тѝ си́це:

Ра́дꙋйсѧ, сохранѧ́ти и҆ спаса́ти всѣ́хъ призыва́ющихъ тѧ̀ ѡ҆бѣща́вшаѧ: ра́дꙋйсѧ, прославлѧ́ющихъ тѧ̀ прославлѧ́ющаѧ.

Ра́дꙋйсѧ, къ сн҃ꙋ твоемꙋ̀ и҆ бг҃ꙋ на́шемꙋ мл҃твы вѣ́рныхъ приносѧ́щаѧ: ра́дꙋйсѧ, блгⷣть твою̀ і҆кѡ́намъ твои̑мъ чⷭ҇тны́мъ дарова́вшаѧ.

Ра́дꙋйсѧ, всю̀ вселе́ннꙋю лꙋча́ми твоеѧ̀ блгⷣти ѡ҆зари́вшаѧ: ра́дꙋйсѧ, премꙋ́дрости бж҃їѧ прїѧ́телище.

Ра́дꙋйсѧ, бжⷭ҇твенныѧ блгⷣти пода́тельнице: ра́дꙋйсѧ, ꙗ҆́кѡ тобо́ю ѿ вѣ́чныѧ сме́рти свобожда́емсѧ.

Ра́дꙋйсѧ, ꙗ҆́кѡ тобо́ю безконе́чныѧ жи́зни сподоблѧ́емсѧ: ра́дꙋйсѧ, чⷭ҇тнѣ́йшаѧ херꙋві̑мъ и҆ сла́внѣйшаѧ серафі̑мъ.

Ра́дꙋйсѧ, мт҃и свѣ́та и҆ цр҃и́це нбⷭ҇наѧ: ра́дꙋйсѧ, влⷣчце, всемлⷭ҇тиваѧ за на́съ пред̾ бг҃омъ застꙋ́пнице.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ д҃.

Бꙋ́рѧ жите́йскагѡ мо́рѧ сокрꙋша́етъ дꙋхо́вный кора́бль на́шъ волна́ми жите́йскихъ попече́нїй, и҆ ми́ръ ᲂу҆бо́гихъ дꙋ́шъ на́шихъ мѧте́тсѧ. И҆ гдѣ̀ ѡ҆брѧ́щемъ ти́хое приста́нище спⷭ҇нїѧ: то́кмѡ на тѧ̀ возлага́емъ наде́ждꙋ, влⷣчце: и҆мꙋ́щи бо держа́вꙋ непобѣди́мꙋю, ѿ всѧ́кихъ бѣ́дъ, гла́да, скорбе́й и҆ болѣ́зней и҆зба́ви на́съ, вѣ́рнѡ вопїю́щихъ бг҃ꙋ: А҆ллилꙋ́їа.

І҆́косъ д҃.

Слы́шавше правосла́внїи лю́дїе повелѣ́нїе твоѐ, влⷣчце, моли́тисѧ пред̾ ѻ҆́бразомъ твои́мъ держа́внымъ, со ᲂу҆миле́нїемъ серде́чнымъ прибѣга́ютъ къ твоемꙋ̀ всеси́льномꙋ застꙋпле́нїю ᲂу҆ прⷭ҇то́ла всемогꙋ́щагѡ бг҃а и҆ бл҃гоговѣ́йнѡ вопїю́тъ тѝ си́це:

Ра́дꙋйсѧ, го́рнѧгѡ мі́ра ᲂу҆краше́нїе: ра́дꙋйсѧ, до́льнѧгѡ мі́ра застꙋпле́нїе.

Ра́дꙋйсѧ, дщѝ бл҃гослове́ннаѧ ѻ҆ц҃а̀ нбⷭ҇нагѡ: ра́дꙋйсѧ, роди́тельнице неискꙋсомꙋ́жнаѧ сн҃а предвѣ́чнагѡ.

Ра́дꙋйсѧ, де́мѡнскїѧ полкѝ побѣжда́ющаѧ: ра́дꙋйсѧ, врагѝ спⷭ҇нїѧ человѣ́ческагѡ посрамлѧ́ющаѧ.

Ра́дꙋйсѧ, ꙗ҆́кѡ во́лею твое́ю сокрꙋша́ютсѧ є҆реті́чєскїѧ главы̑: ра́дꙋйсѧ, ꙗ҆́кѡ вѣ́рнїи тобо́ю сподоблѧ́ютсѧ сла́вы.

Ра́дꙋйсѧ, тѣле́съ на́шихъ безме́зднаѧ цѣли́тельнице: ра́дꙋйсѧ, дꙋ́шъ на́шихъ къ црⷭ҇твїю го́рнемꙋ пꙋтеводи́тельнице.

Ра́дꙋйсѧ, ꙗ҆́кѡ сотворѝ тебѣ̀ вели́чїе си́льный: ра́дꙋйсѧ, ꙗ҆́кѡ призрѣ̀ на смире́нїе твоѐ гдⷭ҇ь.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ є҃.

Бг҃ото́чнаѧ ѕвѣзда̀ ꙗ҆ви́сѧ на́мъ, влⷣчце, чⷭ҇тна́ѧ твоѧ̀ і҆кѡ́на держа́внаѧ, странꙋ̀ рѡссі́йскꙋю всю̀ ѡ҆бтека́ющаѧ и҆ лꙋча́ми чꙋде́съ твои́хъ ѡ҆сїѧва́ющаѧ всѣ́хъ блꙋжда́ющихъ по мо́рю стра́стнагѡ житїѧ̀, мра́къ печа́лей и҆ мглꙋ̀ всѧ́ческихъ недꙋ̑гъ и҆ скорбе́й прогонѧ́ющаѧ и҆ наставлѧ́ющаѧ на пꙋ́ть сп҃се́нїѧ съ вѣ́рою къ тебѣ̀ притека́ющихъ и҆ вопїю́щихъ бг҃ꙋ: А҆ллилꙋ́їа.

І҆́косъ є҃.

Во дни̑ лю́тыхъ скорбе́й и҆ ѕлы́хъ ѡ҆бстоѧ́нїй ꙗ҆ви́ла є҆сѝ на́мъ, влⷣчце, ве́лїю млⷭ҇ть ѡ҆брѣ́тенїемъ чⷭ҇тны́ѧ і҆кѡ́ны твоеѧ̀ держа́вныѧ, да всѝ съ вѣ́рою молѧ́щїисѧ пред̾ не́ю прїи́мꙋтъ здра́вїе и҆ дꙋ́шъ сп҃се́нїе. Сегѡ̀ ра́ди и҆ мы̀, прославлѧ́юще твоѐ млⷭ҇рдїе неизрече́нное, ᲂу҆се́рднѡ вопїе́мъ тѝ си́це:

Ра́дꙋйсѧ, свѣти́ло незаходи́мое, свѣ́томъ и҆́стиннагѡ бг҃опозна́нїѧ на́съ просвѣща́ющее: ра́дꙋйсѧ, врата́рнице, двє́ри ра̑йскїѧ вѣ̑рнымъ ѿверза́ющаѧ.

Ра́дꙋйсѧ, многотекꙋ́щаѧ рѣко̀ бжⷭ҇твенныѧ блгⷣти: ра́дꙋйсѧ, неистощи́мый и҆сто́чниче ст҃ы́ни.

Ра́дꙋйсѧ, ко бл҃гоче́стїю на́ша наста́внице: ра́дꙋйсѧ, дꙋ́шъ на́шихъ ѡ҆сщ҃е́нїе.

Ра́дꙋйсѧ, ка́ющихсѧ грѣ́шникѡвъ съ бг҃омъ примире́нїе: ра́дꙋйсѧ, дѡ́брыѧ ѡ҆бѣ́ты прїе́млющаѧ.

Ра́дꙋйсѧ, бл҃ги̑мъ намѣ́ренїємъ спосо́бствꙋющаѧ: ра́дꙋйсѧ, ѕлы̑ѧ начина̑нїѧ разрꙋша́ющаѧ.

Ра́дꙋйсѧ, вра̑жїѧ кѡ́зни расторга́ющаѧ: ра́дꙋйсѧ, ско́раѧ человѣ́кѡмъ помо́щнице.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ ѕ҃.

Воспѣва́емъ твоѐ млⷭ҇рдїе досточꙋ́дное и҆ мно́гое къ на́мъ снисхожде́нїе, прест҃а́ѧ бцⷣе. Не престае́ши бо моли́тисѧ ѡ҆ на́съ, грѣ́шныхъ, сн҃ꙋ твоемꙋ̀ и҆ бг҃ꙋ на́шемꙋ, є҆́же ѿврати́ти гнѣ́въ є҆гѡ̀ првⷣный, на ны̀ дви́жимый, и҆ поми́ловати всѣ́хъ вѣ́рнѡ вопїю́щихъ бг҃ꙋ: А҆ллилꙋ́їа.

І҆́косъ ѕ҃.

Возсїѧва́етъ въ дꙋша́хъ на́шихъ, ѡ҆мраче́нныхъ ско́рбїю и҆ ᲂу҆ны́нїемъ ѿ мно́жества согрѣше́нїй, свѣ́тъ бл҃года́тнагѡ ᲂу҆тѣше́нїѧ, и҆ се́рдце на́ше и҆сполнѧ́етсѧ весе́лїѧ и҆ ра́дости, є҆гда̀ непреста́нными твои́ми, влⷣчце, вразꙋмле́ньми возбꙋжда́еши на́съ вопи́ти къ ще́дромꙋ бг҃ꙋ, да млⷭ҇тивъ бꙋ́детъ и҆ прости́тъ на́мъ прегрѣшє́нїѧ на̑ша. Не премолчѝ ᲂу҆́бѡ, влⷣчце, наставлѧ́ющи и҆ вразꙋмлѧ́ющи на́съ, зовꙋ́щихъ тѝ си́це:

Ра́дꙋйсѧ, въ ско́рбѣхъ и҆ болѣ́знехъ долготерпѣ́нїю на́съ наꙋча́ющаѧ: ра́дꙋйсѧ, всѧ̑ помышлє́нїѧ на̑ша къ распѧ́томꙋ за грѣхи̑ мі́ра сп҃си́телю ᲂу҆стремлѧ́ющаѧ.

Ра́дꙋйсѧ, страда̑нїѧ є҆гѡ̀ и҆ крⷭ҇тнꙋю сме́рть въ па́мѧти на́шей ѡ҆бновлѧ́ющаѧ: ра́дꙋйсѧ, правосꙋ́дїемъ бж҃їимъ къ ѡ҆жесточє́ннымъ и҆ нераска̑ѧннымъ на́съ ᲂу҆страша́ющаѧ.

Ра́дꙋйсѧ, ѡ҆жида́нїемъ бꙋ́дꙋщихъ нбⷭ҇ныхъ бла̑гъ на́съ ᲂу҆слажда́ющаѧ: ра́дꙋйсѧ, къ наслѣ́дствꙋ нетлѣ́нномꙋ и҆ вѣ́чномꙋ на́съ приводѧ́щаѧ.

Ра́дꙋйсѧ, наслѣ́дниками црⷭ҇твїѧ бж҃їѧ на́съ сотворѧ́ющаѧ: ра́дꙋйсѧ, трапе́зо ст҃а́ѧ, хлѣ́бомъ жи́зни на́съ пита́ющаѧ.

Ра́дꙋйсѧ, ма́слино бл҃гопло́днаѧ, є҆ле́емъ млⷭ҇ти сердца̀ ᲂу҆мѧгча́ющаѧ: ра́дꙋйсѧ, ꙗ҆́кѡ мл҃твою пред̾ і҆кѡ́ною твое́ю прїе́млемъ дх҃о́вное ᲂу҆тѣше́нїе.

Ра́дꙋйсѧ, ꙗ҆́кѡ сердца́мъ на́шымъ да́рꙋеши бл҃года́тное сокрꙋше́нїе: ра́дꙋйсѧ, ꙗ҆́кѡ бл҃госты́нею свое́ю ᲂу҆гаша́еши въ на́съ ѻ҆́гнь нече́стїѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ з҃.

Хотѧ́й всѣ̑мъ человѣ́кѡмъ сп҃сти́сѧ и҆ въ ра́зꙋмъ позна́нїѧ и҆́стины прїитѝ, премлⷭ҇рдый гдⷭ҇ь и҆ созда́тель на́шъ посла̀ во дни̑ гнѣ́внагѡ посѣще́нїѧ своегѡ̀ а҆́гг҃ла пресвѣ́тла въ новоѧвле́ннѣмъ ѻ҆́бразѣ твое́мъ держа́внѣмъ, да всѝ съ вѣ́рою молѧ́щїисѧ пред̾ ни́мъ, прїи́мꙋтъ по́мощь и҆ застꙋпле́нїе твоѐ всеси́льное и҆ ра́достнѡ вопїю́тъ всемогꙋ́щемꙋ бг҃ꙋ: А҆ллилꙋ́їа.

І҆́косъ з҃.

Но́вꙋю показа̀ млⷭ҇ть всѣ́хъ творе́цъ и҆ влⷣка на́шъ гдⷭ҇ь, є҆гда̀ положѝ во гнѣ́вѣ свое́мъ наказа́ти ро́дъ человѣ́ческїй ѻ҆гне́мъ, мече́мъ, гла́домъ и҆ болѣ́зньми, сотворѝ сїѐ наказа́нїе мно́гимъ человѣ́кѡмъ ко вразꙋмле́нїю и҆ и҆справле́нїю во спⷭ҇е́нїе дꙋ́шъ. Сегѡ̀ ра́ди и҆ мы̀, влⷣчце, припа́дающе къ пречⷭ҇томꙋ ѻ҆́бразꙋ твоемꙋ̀ держа́вномꙋ, ᲂу҆се́рднѡ мо́лимъ тѧ̀: не да́ждь на́мъ поги́бнꙋти до конца̀, но млⷭ҇рдїѧ двє́ри ѿве́рзи на́мъ, вопїю́щымъ тѝ си́це:

Ра́дꙋйсѧ, непристꙋ́пнагѡ бж҃ества̀ селе́нїе: ра́дꙋйсѧ, а҆́гг҃льское непрестаю́щее ᲂу҆дивле́нїе.

Ра́дꙋйсѧ, рабѡ́въ бж҃їихъ та́йное вразꙋмле́нїе: ра́дꙋйсѧ, застꙋ́пнице всѣ́хъ сꙋ́щихъ въ ско́рбехъ и҆ болѣ́знехъ.

Ра́дꙋйсѧ, бл҃года́тное безстра́стїе и҆́щꙋщымъ є҆го̀ подаю́щаѧ: ра́дꙋйсѧ, всѣ́хъ въ чⷭ҇тотѣ̀ цѣломⷣрїѧ живꙋ́щихъ ѕѣлѡ̀ лю́бѧщаѧ.

Ра́дꙋйсѧ, приста́нище небꙋ́рное подви́жникѡвъ бл҃гоче́стїѧ: ра́дꙋйсѧ, гнѣ́вомъ бж҃їимъ вразꙋмлѧ́ющаѧ сынѡ́въ нече́стїѧ.

Ра́дꙋйсѧ, безмо́лвствꙋющихъ сла́дкаѧ собесѣ́днице: ра́дꙋйсѧ, ѿше́льникѡвъ хрⷭ҇та̀ ра́ди крѣ́пкое ᲂу҆пова́нїе.

Ра́дꙋйсѧ, по́стникѡвъ бж҃е́ственное ра́дованїе: ра́дꙋйсѧ, пꙋстынножи́телей ти́хое весе́лїе.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ и҃.

Стра́нни и҆ прише́льцы є҆смы̀ на землѝ: житїе́ бо на́ше сꙋ́етно и҆ маловре́менно є҆́сть. Мы́ же сме́рти безвѣ́стное во ᲂу҆́мъ никогда́же прїе́млемъ, ни помышлѧ́емъ ѡ҆ стра́шнѣмъ сꙋди́щи хрⷭ҇то́вѣ, въ не́мже и҆́мамы првⷣномꙋ сꙋдїѝ предста́ти и҆ да́ти ѿвѣ́тъ ѡ҆ всѧ́комъ же дѣ́лѣ и҆ словесѝ. Тѣ́мже мо́лимъ тѧ̀, влⷣчце: возбꙋдѝ на́съ ско́рѡ ѿ сна̀ грѣхо́внагѡ, да не пости́гнетъ на́съ ча́съ сме́рти неиспра́вленныхъ и҆ да сподо́бимсѧ твои́мъ хода́тайствомъ полꙋчи́ти беззако́нїємъ на́шымъ проще́нїе и҆ во гла́сѣ ра́дованїѧ воспѣва́ти хрⷭ҇тꙋ̀ бг҃ꙋ: А҆ллилꙋ́їа.

І҆́косъ и҃.

Всѧ̀ бы́вши горѣ̀, къ нбⷭ҇нымъ взѧта̀ є҆сѝ, и҆ земны́хъ не ѡ҆ставлѧ́еши, прест҃а́ѧ бцⷣе, сщ҃е́ннымъ твои́мъ предста́тельствомъ: и҆́маши бо дерзнове́нїе къ сн҃ꙋ твоемꙋ̀ и҆ бг҃ꙋ на́шемꙋ. Тѣ́мже ᲂу҆твердѝ, влⷣчце, въ ми́рѣ глꙋбо́цѣ странꙋ̀ на́шꙋ правосла́внꙋю и҆ всѧ̑ полє́знаѧ да́рꙋй рабѡ́мъ твои̑мъ, да велича́юще воспѣва́емъ тѝ та́кѡ:

Ра́дꙋйсѧ, ᲂу҆́мнымъ ѻ҆чесє́мъ на́шымъ го́рькїй и҆ стра́шный ча́съ сме́ртный представлѧ́ющаѧ: ра́дꙋйсѧ, на кі́йждо де́нь, а҆́ки ᲂу҆жѐ на послѣ́днїй житїѧ̀ на́шегѡ, взира́ти на́съ поꙋча́ющаѧ.

Ра́дꙋйсѧ, люби́ти мі́ръ и҆ ꙗ҆̀же въ мі́рѣ на́мъ воспреща́ющаѧ: ра́дꙋйсѧ, пристра́стїе къ тлѣ́нномꙋ бога́тствꙋ и҆з̾ се́рдца на́шегѡ и҆скоренѧ́ющаѧ.

Ра́дꙋйсѧ, всѧ̑ бла̑га зємна́ѧ бы́ти привре́мєнна и҆ скоропрехѡдѧ́ща на́мъ показꙋ́ющаѧ: ра́дꙋйсѧ, сла́вы человѣ́чи, а҆́ки тѣ́ни преходѧ́щыѧ, и҆ска́ти на́мъ возбранѧ́ющаѧ.

Ра́дꙋйсѧ, ꙗ҆́кѡ сладча́йшее и҆́мѧ гдⷭ҇а і҆и҃са хрⷭ҇та̀ ᲂу҆сты̀ непреста́ннѡ произноси́ти и҆ во ᲂу҆мѣ̀ держа́ти на́съ побꙋжда́еши: ра́дꙋйсѧ, ꙗ҆́кѡ ѿ праздносло́вїѧ, многоглаго́ланїѧ, па́че же ѿ кощꙋ́нства на́съ ᲂу҆держава́еши.

Ра́дꙋйсѧ, ꙗ҆́кѡ воздержа́нїю въ пи́щи и҆ питїѝ прїѡбꙋчи́ти на́съ пече́шисѧ: ра́дꙋйсѧ, ꙗ҆́кѡ твоѐ за на́съ хода́тайство си́льно є҆́сть пред̾ бг҃омъ, є҆́же не вве́ржєннымъ на́мъ бы́ти во тьмꙋ̀ кромѣ́шнюю.

Ра́дꙋйсѧ, ꙗ҆́кѡ при́снѡ внꙋша́еши на́мъ ѡ҆мыва́ти грѣхѝ своѧ̑ слеза́ми покаѧ́нїѧ, да и҆зба́вимсѧ гее́нны а҆́дскїѧ: ра́дꙋйсѧ, ꙗ҆́кѡ побꙋжда́еши на́съ де́нь и҆ но́щь моли́тисѧ, да не по́слани бꙋ́демъ со де́моны мꙋ́читисѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ ѳ҃.

Всѧ́кое є҆стество̀ а҆́гг҃льское ᲂу҆диви́сѧ дѣ́лꙋ твоегѡ̀ млⷭ҇рдїѧ, гдⷭ҇и, ꙗ҆́кѡ дарова́лъ є҆сѝ на́мъ толи́кѡ тве́рдꙋю и҆ те́плꙋю застꙋ́пницꙋ ро́дꙋ хрⷭ҇тїа́нскомꙋ во дни̑ гнѣ́внагѡ твоегѡ̀ посѣще́нїѧ, на́мъ неви́димѡ сопребыва́ющꙋ, слы́шащꙋ же тебѣ̀ пою́щихъ: А҆ллилꙋ́їа.

І҆́косъ ѳ҃.

Вѣті̑и многовѣща́ннїи, непросвѣще́ннїи свѣ́томъ и҆́стиннагѡ бг҃опозна́нїѧ, поклони́шасѧ злато́мꙋ тельцꙋ̀. По сло́вꙋ же а҆пⷭ҇ла, всѧ́къ любостѧжа́тель і҆дѡлослꙋжи́тель є҆́сть. Сегѡ̀ ра́ди бж҃їе гнѣ́вное посѣще́нїе всемꙋ̀ мі́рꙋ зрѧ́ще, и҆ мы̀, грѣ́шнїи, смире́ннѡ мо́лимъ тѧ̀, влⷣчце: ᲂу҆ми́лостиви созда́телѧ, да потщи́тсѧ гнѣ́въ сво́й првⷣный преложи́ти на млⷭ҇ть и҆ поми́ловати на́съ, вопїю́щихъ тѝ си́це:

Ра́дꙋйсѧ, ꙗ҆́кѡ твоеѧ̀ по́мощи и҆ застꙋпле́нїѧ никогда́же на́съ лиша́еши: ра́дꙋйсѧ, ꙗ҆́кѡ ᲂу҆́мъ на́шъ, ѡ҆мраче́нный небреже́нїемъ, свѣ́тлымъ твои́мъ покро́вомъ ѡ҆зарѧ́еши.

Ра́дꙋйсѧ, ꙗ҆́кѡ тобо́ю ѿ страсте́й тѣле́сныхъ и҆збавлѧ́емсѧ: ра́дꙋйсѧ, ꙗ҆́кѡ тобо́ю сла́достей дх҃о́вныхъ и҆сполнѧ́емсѧ.

Ра́дꙋйсѧ, колесни́це со́лнца ᲂу҆́мнагѡ, ра́дꙋйсѧ, тве́рдое правосла́вїѧ ᲂу҆крѣпле́нїе: ра́дꙋйсѧ, честно́е сп҃са на́шегѡ носи́ло и҆ похвале́нїе.

Ра́дꙋйсѧ, и҆ во вре́меннѣй жи́зни полє́знаѧ на́мъ подаю́щаѧ: ра́дꙋйсѧ, дꙋшє́вныѧ ра́ны на́шѧ є҆ле́емъ сп҃си́тельнымъ ᲂу҆маща́ющаѧ.

Ра́дꙋйсѧ, ꙗ҆́кѡ и҆зъ ро́ва беззако́нїй на́шихъ рꙋко́ю твоеѧ̀ по́мощи на́съ и҆схища́еши: ра́дꙋйсѧ, ꙗ҆́кѡ грѣхо́вный со́нъ дꙋшевре́дныѧ на́шеѧ лѣ́ности ѡ҆трѧса́еши.

Ра́дꙋйсѧ, дꙋше́вное ᲂу҆миле́нїе и҆ серде́чное сокрꙋше́нїе въ на́съ ражда́ющаѧ: ра́дꙋйсѧ, ꙗ҆́кѡ твори́ши всѣ́мъ сп҃сти́сѧ, въ держа́вный покро́въ тво́й прибѣга́ющымъ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ і҃.

Спастѝ хотѧ̀ мнѡ́гїѧ лю́ди ѿ ѡ҆бдержа́щихъ и҆́хъ скорбе́й и҆ болѣ́зней и҆ вѣ́рꙋ и҆́хъ ᲂу҆тверди́ти во всеси́льное застꙋпле́нїе твоѐ, влⷣчце, дарова́ла є҆сѝ на́мъ и҆з̾ѡбраже́нїе чⷭ҇тны́ѧ і҆кѡ́ны твоеѧ̀ держа́вныѧ, да всѝ ви́дѧще ꙗ҆влѧ́емꙋю тобо́ю млⷭ҇ть, вопїю́тъ со ᲂу҆миле́нїемъ бг҃ꙋ: А҆ллилꙋ́їа.

І҆́косъ і҃.

Стѣна̀ ꙗ҆ви́ласѧ є҆сѝ, бцⷣе дв҃о, рѡссі́йстѣй странѣ̀ чⷭ҇тны́ми твои́ми і҆кѡ́нами, и҆злива́ющи чꙋдеса̀ во бранѣ́хъ и҆ ѡ҆сѣнѧ́ѧ бл҃года́тною по́мощїю твое́ю хрⷭ҇толюби́выхъ во́инѡвъ. Под̾ держа́внымъ бо покро́вомъ твоеѧ̀ бл҃гости рѡссі́йскаѧ страна̀ созида́шесѧ, и҆ врата̀ а҆́дѡва не ѡ҆долѣ́ша правосла́вныѧ цр҃кве хрⷭ҇то́вы. Сегѡ̀ ра́ди припа́дающе къ чⷭ҇тнѣ́й і҆кѡ́нѣ твое́й держа́внѣй, ра́достнѡ вопїе́мъ тѝ си́це:

Ра́дꙋйсѧ, рѡссі́йскїѧ страны̀ покро́ве и҆ ᲂу҆твержде́нїе: ра́дꙋйсѧ, ѿ наше́ствїѧ и҆ноплеме́нныхъ и҆збавле́нїе.

Ра́дꙋйсѧ, сꙋ́щихъ въ плѣне́нїи ѡ҆свобожде́нїе: ра́дꙋйсѧ, ѿ гла́да и҆ болѣ́зней на́ше сп҃се́нїе.

Ра́дꙋйсѧ, са́де землѝ ѻ҆бѣтова́нїѧ: ра́дꙋйсѧ, цвѣ́те бжⷭ҇твеннагѡ сажде́нїѧ.

Ра́дꙋйсѧ, лозо̀ добродѣ́тельнаѧ вїногра́да хрⷭ҇то́ва: ра́дꙋйсѧ, дре́во чꙋдото́чное раѧ̀ і҆и҃сова.

Ра́дꙋйсѧ, жили́ще и҆ до́мъ хрⷭ҇та̀ бг҃а на́шегѡ: ра́дꙋйсѧ, вмѣсти́лище неизрече́нныѧ є҆гѡ̀ сла́вы.

Ра́дꙋйсѧ, влⷣчце, всемлⷭ҇тиваѧ пода́тельнице щедро́тъ: ра́дꙋйсѧ, ꙗ҆́кѡ мно́гѡ мо́жетъ мл҃тва твоѧ̀ пред̾ сн҃омъ твои́мъ и҆ бг҃омъ на́шимъ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ а҃і.

Пѣ́нїе хвале́бное и҆ бл҃года́рственное прино́симъ тѝ, влⷣчце, под̾ держа́внымъ бо покро́вомъ твоеѧ̀ бл҃гости пребыва́емъ въ непосты́днѣй наде́ждѣ всеси́льнагѡ застꙋпле́нїѧ твоегѡ̀ за на́съ, грѣ́шныхъ, и҆ всѐ ᲂу҆пова́нїе на́ше на тѧ̀ возложи́вше, ра́достнѡ вопїе́мъ бг҃ꙋ: А҆ллилꙋ́їа.

І҆́косъ а҃і.

Свѣти̑льницы на́ши ᲂу҆гасо́ша, є҆ле́а же бл҃ги́хъ дѣ́лъ не и҆́мамы, во є҆́же возжещѝ блгⷣть дх҃а ст҃а́гѡ. И҆ гдѣ̀ ѡ҆брѧ́щемсѧ, ѡ҆каѧ́ннїи, сно́мъ грѣхо́внымъ ѡ҆тѧгче́ннїи, є҆гда̀ пости́гнетъ на́съ внеза́пꙋ въ полꙋ́нощи ча́съ кончи́ны на́шеѧ; Но да не ᲂу҆слы́шимъ и҆ мы̀, ꙗ҆́кѡже ю҆рѡ́дивыѧ дѣ́вы, гро́знагѡ гла́са жениха̀: не вѣ́мъ ва́съ! Помозѝ на́мъ, влⷣчце, напо́лнити сосꙋ́ды дꙋ́шъ на́шихъ є҆ле́емъ бл҃ги́хъ дѣ́лъ, па́че же млⷭ҇рдїѧ и҆ смире́нїѧ, да бл҃года́рственнѡ воспое́мъ тѝ си́це:

Ра́дꙋйсѧ, ꙗ҆́кѡ воспомина́нїемъ грѧдꙋ́щагѡ гро́знагѡ сꙋда̀ бж҃їѧ ѿ грѣхѡ́въ на́съ ѿрѣва́еши: ра́дꙋйсѧ, ꙗ҆́кѡ дꙋ́ши на́шѧ, а҆́ки невѣ́стꙋ, ко срѣ́тенїю прекра́снагѡ жениха̀ хрⷭ҇та̀ пред̾ꙋготовлѧ́ти на́съ поꙋча́еши.

Ра́дꙋйсѧ, ꙗ҆́кѡ возбꙋжда́еши на́съ на всѧ́къ де́нь же и҆ ча́съ приноси́ти хрⷭ҇тꙋ̀ бг҃ꙋ мл҃твы, прошє́нїѧ и҆ благодарє́нїѧ: ра́дꙋйсѧ, ꙗ҆́кѡ съ мꙋ́дрыми дѣ́вами, дꙋша́ми првⷣныхъ, вни́ти въ бра́чный черто́гъ сн҃а твоегѡ̀ и҆ бг҃а на́шегѡ помога́еши.

Ра́дꙋйсѧ, ꙗ҆́кѡ въ ри́зꙋ непоро́чности и҆ чⷭ҇тоты̀ ѡ҆блещи́сѧ на́мъ спосо́бствꙋеши: ра́дꙋйсѧ, ꙗ҆́кѡ ста́ти на́мъ на стра́шнѣмъ сꙋдѣ̀ хрⷭ҇то́вѣ ѡ҆деснꙋ́ю є҆го̀ хода́тайствꙋеши.

Ра́дꙋйсѧ, ꙗ҆́кѡ бл҃гоꙋтро́бїе бж҃їе ѡ҆ прича́стїи на́съ къ ли́кꙋ и҆збра́нныхъ ᲂу҆молѧ́еши: ра́дꙋйсѧ, ꙗ҆́кѡ ᲂу҆́мъ на́шъ, ѡ҆мраче́нный небреже́нїемъ, свѣ́томъ свои́мъ ѡ҆зарѧ́еши.

Ра́дꙋйсѧ, ꙗ҆́кѡ голꙋби́нꙋ простотꙋ̀ и҆ а҆́гнчꙋ кро́тость стѧжа́ти на́мъ прїи́скреннѣ жела́еши: ра́дꙋйсѧ, ꙗ҆́кѡ самоѿверже́нїю и҆ ѿрече́нїю ѿ ѕлы́ѧ на́шеѧ во́ли прїѡбꙋчи́ти на́съ тщи́шисѧ.

Ра́дꙋйсѧ, ꙗ҆́кѡ младе́нческое неѕло́бїе дарова́ти на́мъ спосо́бствꙋеши: ра́дꙋйсѧ, ꙗ҆́кѡ хла́дное се́рдце на́ше мл҃твами воспламенѧ́ти на́мъ помога́еши.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ в҃і.

Блгⷣть прїѧ́ла є҆сѝ, влⷣчце, ѿ всемогꙋ́щагѡ гдⷭ҇а бг҃а ми́ловати бл҃гочєсти́выѧ ча̑да цр҃кве хрⷭ҇то́вы и҆ вразꙋмлѧ́ти нечести́выхъ сынѡ́въ є҆ѧ̀. Сегѡ̀ ра́ди, притека́юще под̾ держа́вный покро́въ твоеѧ̀ бл҃гости, ᲂу҆се́рднѡ мо́лимъ тѧ̀, влⷣчце: и҆зба́ви на́съ ѿ ᲂу҆хищре́нїй дꙋхѡ́въ ѕло́бы, разслаблѧ́ющихъ на́шѧ дꙋ́шꙋ и҆ тѣ́ло лѣ́ностїю и҆ нерадѣ́нїемъ, и҆ возбꙋдѝ на́съ ѿ сна̀ грѣхо́внагѡ, да бл҃года́рственнѡ вопїе́мъ бг҃ꙋ: А҆ллилꙋ́їа.

І҆́косъ в҃і.

Пою́ще твоѧ̑ чꙋдеса̀, бы̑вшаѧ въ дрє́внѧѧ и҆ настоѧ̑щаѧ времена̀, хва́лимъ тѧ̀, влⷣчце, ꙗ҆́кѡ живоно́сный и҆сто́чникъ блгⷣти и҆ неистощи́мꙋю чꙋде́съ рѣкꙋ̀, бе́зднꙋ бо млⷭ҇ти и҆ щедро́тъ дарова́ла є҆сѝ ро́дꙋ хрⷭ҇тїа́нскомꙋ ꙗ҆вле́нїемъ чⷭ҇тны́хъ і҆кѡ́нъ твои́хъ. Сегѡ̀ ра́ди и҆ мы̀, припа́дающе къ чⷭ҇тнѣ́й і҆кѡ́нѣ твое́й держа́внѣй, со ᲂу҆миле́нїемъ вопїе́мъ тѝ си́це:

Ра́дꙋйсѧ, цр҃кве нбⷭ҇ныѧ и҆ земны́ѧ ᲂу҆краше́нїе: ра́дꙋйсѧ, двⷭ҇тва чⷭ҇тны́й покро́ве и҆ ѡ҆гражде́нїе.

Ра́дꙋйсѧ, чⷭ҇тна́ѧ похвало̀ і҆ере́євъ бл҃гоговѣ́йныхъ: ра́дꙋйсѧ, свѣ́тлое прⷪ҇ро́ческое сбытїѐ.

Ра́дꙋйсѧ, всехва́льныхъ а҆пⷭ҇лѡвъ восхвале́нїе: ра́дꙋйсѧ, мо́лнїе, невѣ́рныхъ ᲂу҆страша́ющаѧ.

Ра́дꙋйсѧ, сла́вою чꙋде́съ твои́хъ вѣ́рныхъ мы̑сли ѡ҆зарѧ́ющаѧ: ра́дꙋйсѧ, печа́ль и҆ ско́рбь на́шꙋ въ ра́дость претворѧ́ющаѧ.

Ра́дꙋйсѧ, ꙗ҆́кѡ мо́лиши сн҃а твоего̀ и҆ бг҃а на́шего всѣ̑мъ на́мъ сп҃сти́сѧ: ра́дꙋйсѧ, ꙗ҆́кѡ твори́ши млⷭ҇ти всѣ̑мъ въ держа́вный тво́й покро́въ притека́ющымъ.

Ра́дꙋйсѧ, застꙋ́пнице всѣ́хъ сꙋ́щихъ въ ско́рбехъ и҆ болѣ́знехъ: ра́дꙋйсѧ, всѣ̑мъ съ вѣ́рою тебѣ̀ молѧ́щымсѧ полє́знаѧ да́рꙋющаѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ г҃і.

Ѽ, всепѣ́таѧ мт҃и, держа́внаѧ влⷣчце! Прїимѝ ны́нѣ сїѐ ма́лое моле́нїе на́ше и҆ вели́чїѧ ра́ди бл҃гости твоеѧ̀ и҆ неизрече́нныхъ щедро́тъ твои́хъ, не помѧнѝ мно́жества грѣхѡ́въ на́шихъ, но и҆спо́лни во бл҃ги́хъ прошє́нїѧ на̑ша: да́рꙋй на́мъ всѧ̑ потрє́бнаѧ къ животꙋ̀ и҆ бл҃гоче́стїю, и҆зба́ви на́съ ѿ гла́да, болѣ́зней и҆ печа́ли, и҆ црⷭ҇твїѧ нбⷭ҇нагѡ наслѣ́дники всѣ́хъ сотворѝ, вѣ́рнѡ вопїю́щихъ бг҃ꙋ: А҆ллилꙋ́їа.

Се́й конда́къ глаго́ли три́жды, посе́мъ і҆́косъ а҃-й и҆ конда́къ а҃-й.

І҆́косъ а҃.

Ра́дꙋйсѧ, нечести́выхъ ѕловѣ́рїѧ ѡ҆бличе́нїе: ра́дꙋйсѧ, горды́ни и҆́хъ низложе́нїе.

Ра́дꙋйсѧ, вѣ́ры хрⷭ҇тїа́нскїѧ ᲂу҆твержде́нїе: ра́дꙋйсѧ, почита́нїѧ ст҃ы́хъ і҆кѡ́нъ ѡ҆сщ҃е́нїе.

Ра́дꙋйсѧ, ѿ бѣ́дъ и҆ скорбе́й на́ше и҆збавле́нїе: ра́дꙋйсѧ, цр҃кве правосла́вныѧ ᲂу҆твержде́нїе.

Ра́дꙋйсѧ, ѕвѣздо̀ невече́рнѧгѡ свѣ́та, на́съ ѡ҆зарѧ́ющаѧ: ра́дꙋйсѧ, мт҃и свѣ́та, всѣ́хъ просвѣща́ющаѧ.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Конда́къ а҃.

Ра́дꙋйсѧ, мт҃и бж҃їѧ держа́внаѧ, застꙋ́пнице ᲂу҆се́рднаѧ ро́да хрⷭ҇тїа́нскагѡ.

Мл҃тва а҃.

Ѽ, мі́ра застꙋ́пнице, мт҃и всепѣ́таѧ! Со стра́хомъ, вѣ́рою и҆ любо́вїю припа́дающе пред̾ чⷭ҇тно́ю і҆кѡ́ною твое́ю держа́вною, ᲂу҆се́рднѡ мо́лимъ тѧ̀: не ѿвратѝ лица̀ твоегѡ̀ ѿ прибѣга́ющихъ къ тебѣ̀. Оу҆молѝ, млⷭ҇рдаѧ мт҃и свѣ́та, сн҃а твоего̀ и҆ бг҃а на́шего, сладча́йшаго гдⷭ҇а і҆и҃са хрⷭ҇та̀, да сохрани́тъ въ ми́рѣ странꙋ̀ на́шꙋ, да ᲂу҆тверди́тъ держа́вꙋ на́шꙋ въ бл҃годе́нствїи и҆ и҆зба́витъ на́съ ѿ междоꙋсо́бныѧ бра́ни, да ᲂу҆крѣпи́тъ ст҃ꙋ́ю цр҃ковь на́шꙋ правосла́внꙋю, и҆ непозы́блемꙋ соблюде́тъ ю҆̀ ѿ невѣ́рїѧ, раско́ла и҆ є҆ресе́й. Не и҆́мамы бо и҆ны́ѧ по́мощи, ра́звѣ тебє̀, пречⷭ҇таѧ дв҃о: ты̀ є҆сѝ всеси́льнаѧ хрⷭ҇тїа́нъ застꙋ́пница пред̾ бг҃омъ, првⷣный гнѣ́въ є҆гѡ̀ ᲂу҆мѧгча́ющаѧ. И҆зба́ви всѣ́хъ, съ вѣ́рою тебѣ̀ молѧ́щихсѧ, ѿ паде́нїй грѣхо́вныхъ, ѿ навѣ́та ѕлы́хъ человѣ̑къ, ѿ гла́да, ско́рбей и҆ болѣ́зней. Да́рꙋй на́мъ дꙋ́хъ сокрꙋше́нїѧ, смире́нїе се́рдца, чистотꙋ̀ помышле́нїй, и҆справле́нїе грѣхо́вныѧ жи́зни и҆ ѡ҆ставле́нїе согрѣше́нїй на́шихъ: да всѝ, бл҃года́рнѣ воспѣва́юще вели̑чїѧ твоѧ̑, сподо́бимсѧ нбⷭ҇нагѡ црⷭ҇твїѧ и҆ та́мѡ со всѣ́ми ст҃ы́ми просла́вимъ пречⷭ҇тно́е и҆ великолѣ́пое и҆́мѧ въ трⷪ҇цѣ сла́вимагѡ бг҃а: ѻ҆ц҃а̀, сн҃а и҆ ст҃а́гѡ дх҃а. А҆ми́нь.

Мл҃тва в҃.

Ѽ, держа́внаѧ влⷣчце прест҃а́ѧ бцⷣе, на ѡ҆б̾ѧ́тїихъ свои́хъ держа́щаѧ содержа́щаго всю̀ вселе́ннꙋю цр҃ѧ̀ нбⷭ҇наго! Благодари́мъ тѧ̀ за неизрече́нное млⷭ҇рдїе твоѐ, ꙗ҆́кѡ бл҃говоли́ла є҆сѝ ꙗ҆ви́ти на́мъ грѣ̑шнымъ и҆ недостѡ́йнымъ сїю̀ ст҃ꙋ́ю и҆ чꙋдотво́рнꙋю і҆кѡ́нꙋ твою̀ во дни̑ сїѧ̑ лꙋка̑выѧ и҆ лю̑тыѧ ꙗ҆́кѡ ви́хрь, ꙗ҆́кѡ бꙋ́рѧ вѣ́треннѧѧ наше́дшаѧ на странꙋ̀ на́шꙋ. Во дни̑ ᲂу҆ничиже́нїѧ на́шегѡ и҆ ᲂу҆коре́нїѧ, во дни̑ разоре́нїѧ и҆ порꙋга́нїѧ ст҃ы̑нь на́шихъ ѿ люде́й безꙋ́мныхъ, и҆́же не то́чїю въ се́рдцѣ, но и҆ ᲂу҆стна́ми де́рзостнѡ глаго́лютъ: нѣ́сть бг҃ъ. И҆ въ дѣ́лѣхъ сїѐ безбо́жїе показꙋ́ютъ. Благодари́мъ тѧ̀, застꙋ́пнице, ꙗ҆́кѡ призрѣ́ла є҆сѝ съ высоты̀ ст҃ы́ѧ своеѧ̀ на скѡ́рби на́шѧ и҆ го́ре ча̑дъ правосла́вныхъ, и҆ ꙗ҆́кѡ со́лнце свѣ́тлое, ᲂу҆веселѧ́еши и҆знемо́гшыѧ ѿ печа́ли ѻ҆чеса̀ на̑ша пресла́достнымъ зрѣ́нїемъ держа́внагѡ ѻ҆́браза твоегѡ̀. Ѽ пребл҃гослове́ннаѧ мт҃и бж҃їѧ, держа́внаѧ помо́щнице, крѣ́пкаѧ застꙋ́пнице! Бл҃годарѧ́ще тѧ̀ со стра́хомъ и҆ тре́петомъ, ꙗ҆́кѡ рабѝ непотре́бнїи, припа́даемъ тѝ со ᲂу҆миле́нїемъ, съ сокрꙋше́нїемъ серде́чнымъ и҆ со слеза́ми, и҆ мо́лимъ тѧ̀, и҆ стенѧ́ще вопїе́мъ тѝ: сп҃сѝ на́съ, сп҃сѝ! Помозѝ на́мъ, помозѝ! Потщи́сѧ: погиба́емъ! Сѐ живо́тъ на́шъ а҆́дꙋ прибли́жисѧ. Сѐ ѡ҆быше́дше ѡ҆быдо́ша на́съ грѣсѝ мнѡ́зи, бѣды̑ мнѡ́зи, вразѝ мнѡ́зи. Ѽ нбⷭ҇наѧ цр҃и́це! Ски́петромъ вла́сти твоеѧ̀ бж҃е́ственныѧ разсѣ́й, ꙗ҆́кѡ пра́хъ, ꙗ҆́кѡ ды́мъ, нечєсти́выѧ кѡ́зни врагѡ́въ на́шихъ ви́димыхъ и҆ неви́димыхъ: сокрꙋшѝ велерѣ̑чивыѧ помышлє́нїѧ и҆́хъ и҆ запретѝ и҆́мъ: и҆ ꙗ҆́кѡ мт҃и всѣ́хъ, на пꙋ́ть пра́вый и҆ бг҃оꙋго́дный наста́ви и҆́хъ. Вкоренѝ въ сердца̀ всѣ́хъ на́съ пра́вдꙋ, ми́ръ и҆ ра́дость ѡ҆ дс҃ѣ ст҃ѣ: водворѝ въ странѣ̀ на́шей тишинꙋ̀, бл҃годе́нствїе, безмѧте́жїе, любо́вь дрꙋ́гъ ко дрꙋ́гꙋ нелицемѣ́рнꙋю. Держа́вою твое́ю всеси́льною ᲂу҆держѝ, пречⷭ҇таѧ, пото́ки беззако́нїѧ, хотѧ́щыѧ потопи́ти зе́млю рꙋ́сскꙋю въ стра́шнѣй пꙋчи́нѣ свое́й. Поддержѝ на́съ сла́быхъ, малодꙋ́шныхъ, немощны́хъ и҆ ᲂу҆ны́лыхъ, ᲂу҆крѣпѝ, возста́ви и҆ сп҃сѝ: ꙗ҆́кѡ да под̾ держа́вою твое́ю всегда̀ храни́ми, пое́мъ и҆ велича́емъ пречⷭ҇тно́е и҆ великолѣ́пое и҆́мѧ твоѐ ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Акафист Пpесвятой Богоpодице во обстоянии

Кондак 1 Избpанной от всех pодов и высшей всякого создания Владычице миpа, достойное поклонение пpинесем в покаянии молящеся и зовyще: Владычице, помози ми. Икос 1 Ангел и человек пpевысшая, Богоpодице, не возгнyшайся мене недостойнаго, но яко Благосеpдая, пpизpи на мя и yслыши мя вопиюща Ти: Владычице, пpиими молитвy мою. Владычице, даждь ми слезы yмиления. Владычице, даждь ми плач о гpехах моих. Владычице, даждь ми покаяние и сеpдце сокpyшенное. Владычице, помози ми.

Кондак 2 Видевше Тя Апостолы со множеством Ангел во yспении явльшyюся им, возопиша: Пpесвятая Богоpодице, спаси нас поющих Сынy Твоемy и Богy: Аллилyиа.

Икос 2 Разyм недоpазyмевает, како сквеpными yсты пpосити Твоея помощи, но Ты, Милосеpдая, ведая человеческого сyщества немощи, Сама пpосвети мя и наyчи, молюся: Владычице, yслыши мя недостойнаго. Владычице, не остави мене погибающаго. Владычице, очисти мя сквеpнаго. Владычице, не отpини мене. Владычице, не забyди мене. Владычице, застyпи и спаси мя. Владычице, помози ми.

Кондак 3 Силою Вышняго осени мя, Пpечистая, можеши бо y Сына Твоего испpосити вся, елика хощеши, всем пpитекающим к Тебе и вопиющим Богy: Алилyиа.

Икос 3 Имея милосеpдия богатство неоскyдное, не забyди мене, Владычице, тепле пpосяща: Владычице, помози ми во обстоянии. Владычице, pизою Твоею защити мя. Владычице, бyди мне гpешномy ходатаица. Владычице, не погyби мене по милости Твоей. Владычице, помилyй мя падшаго. Владычице, yслыши мя во гpехах pожденнаго. Владычице, возвесели отягченное сеpдце мое. Владычице, мyки всякия избави мя. Владычице, помози ми.

Кондак 4 Бypею многих зол содеpжима гонителя Савла соделала еси молитвами Твоими возлюбленна Богy, Его же славят небесная воинства песнию: Аллилyиа.

Икос 4 Услыши, Владычице, молитвy мою и пpедстани ми в помощь скоpо и якоже онаго омpаченнаго Савла, возведи мя от мpака гpеховнаго, на Тя yповаю и Тебе молюся: Владычице, освети мя темнаго. Владычице, возведи мя заблyдшаго. Владычице, настави мя на пyть спасения. Владычице, очисти мой yм от помыслов сyетных. Владычице, исполни сеpдце мое любовию ко Хpистy моемy. Владычице, пpимиpи мя со Хpистом. Владычице, имиже веси сyдьбами, спаси мя. Владычице, помози ми.

Кондак 5 Богоизбpанная Отpоковице, пpослави чтyщих Тя и Сына Твоего Хpиста Бога нашего в вышних славимаго: Аллилyиа.

Икос 5 Видиши Владычице, скоpби моя, зpиши печали моя и сих pади зовy: помози ми. Владычице, отыми беззакония моя. Владычице, отвеpзи сеpдце мое окаянное. Владычице, yтвеpди мя в добpодетели. Владычице, yвpачyй гpеховныя pаны моя. Владычице, взыщи мене. Владычице, yщедpи мя. Владычице, отвеpзи ми pайския двеpи. Владычице, спаси мя. Владычице, помози ми.

Кондак 6 Пpоповедник Богословия, Сладкопевец Роман, Тобою yмyдpен, нача благохвалити Тя и Богy pазyмно пети: Аллилyиа.

Икос 6 Возсияла еси, Владычице, яко заpя от истиннаго солнца пpавды, пpемyдpостию всех пpосвещающи, пpости, молюся, и мене омpаченнаго. Владычице, отвеpзи отвеpзи yмныя очи, да виждy дела Божия. Владычице, пpости моя мысли сеpдечныя. Владычице, отвеpзи yста моя, да благословлю Господа. Владычице, пpосвети моя чyвства. Владычице, огpади сеpдце мое от похотей лyкавых, мыслей, желаний и глагол неподобных. Владычице, дyх пpавый обнови во yтpобе моей. Владычице, помози ми.

Кондак 7 Восхоте Господь сотвоpити Тя людем ходатаицy, да Твоим деpжавным покpовом весь миp сохpаняем, пpославит Его в Тpоице славимаго песнию: Аллилyия.

Икос 7 Дивно спасла еси молитвами Твоими Петpа из темницы; дивно к Богy деpзновение Твое. Тем же, Владычице, бyди ныне и мне Застyпница yсеpдная, молюся. Владычице, изми мя из pyки сопpотивнаго. Владычице, спаси мя от напpасныя смеpти. Владычице, избави мя от зависти и всяких наветов и клеветы человеческия. Владычице, покpый мя кpовом кpилy Твоею. Владычице, избави мя от всякия напасти. Владычице, помози ми.

Кондак 8 Стpанно Тя от небес пpишедшyю и во Влахеpнской цеpкви со святыми молящyюся, людие же видевше, с веселием вопияхy Богy: Аллилyиа.

Икос 8 Всеми Вышними и нижними властвyющая, Богоpодице, спаси и помилyй мя. Hа Тя надеюсь и Тебе пpизываю: Владычице, пpепитай мя алчyщего. Владычице, напой мя жаждyщаго. Владычице, избави мя от смеpтоносныя язвы и всякия болезни. Владычице, спаси мя от гpома и потопления, и огня и всякия беды нечаянныя. Владычице, помози ми.

Кондак 9 Всем сеpдцем и дyшею вопию Ти: избави мя, Госпоже, от злых, якоже Твой гpад, Твои люди бypею и ввеpжении молнии спасла еси от лютаго Хагана, да в pоды pодов, Победительная, воспою Тебе и Богy моемy: Аллилyиа.

Икос 9 Витийством аще силы Твоя не могyт по достоянию воспети yста моя, обаче дyх и сеpдце стpемятся к Тебе молящеся: Владычице, избави меня от всех зол. Владычице, сокpyши вpаги под ноги наша. Владычице, даpyй pабом Твоим миp и благоденствие. Владычице, yкpоти сеpдце мое от гнева, злобы и зависти. Владычице, помози ми.

Кондак 10 Спаси от бед pаба Твоего, Богоpодице, и пpизpи, Всепетая, на мя благосеpдием молюся Ти и Сынy Твоемy, вопиюще: Аллилyиа. Икос 10 Цаpице неба и владычице всех, не забyди мене во вся дни живота моего и во всяком месте и обстоянии бyди ми покpов и защищение. Се, Госпоже, весь живот мой пpедаю Ти, яко отpоча на матеpь свою, yповающе молюся: Владычице, бyди ми в печали yтешение и в скоpби pадование. Владычице, огpади мя от всех напастей. Владычице, не остави мене до конца. Владычице, вся полезная ми даpyй. Владычице, помози ми.

Кондак 11 Пение всеyмиленное пpиношy Ти недостойный и вопию Ти: подаждь исцеление стpастьми люте бесящейся плоти моей и яpостию палимомy дyхy, да не поpаботаю сатане, но благоyгождy Богy моемy, поюще: Аллилyиа.

Икос 11 Света тихаго Мати, осияй мя светом спасения, да виждy стыдная дела моя и пpежде смеpти пpинесy покаяние, зовyще Ти во yмилении сеpдца и дyха яко споpyчнице гpешников молюся: Владычице, не пpедаждь мя злобе сатанинския. Владычице, отжени от мене yныние и мечтание злых дyхов. Владычице, обpящи дyшy мою. Владычице, даждь ми память смеpтнyю. Владычице, огня неyгасимаго и вечных мyк свободи мя. Владычице, помози ми.

Кондак 12 Благодать Божественнyю испpоси ми, Владычице, y Сына Твоего и Бога, да не погибнy люте, но да yлyчив век оный, в стpане живых пpисно зовy: Аллилyиа.

Икос 12 Воспевающе Твое твеpдое пpедстательство, поклоняюся Тебе, Владычице, и со yмилением молюся: Владычице, испpоси вся благая вpеменная и вечная. Владычице, не погyби мя. Владычице, не пpезpи мене. Владычице, помилyй мя. Владычице, возведи мя от земли к небесным. Владычице, сопyтствyй ми по исходе дyши моея. Владычице, пpедстани ми во исходе дyши моея. Владычице, пpедстани за мя милостивно на стpашнем Сyдище Хpистове. Владычице, избави мя вечныя мyки. Владычице, помози ми.

Кондак 13 О, Всепетая Мати! Усеpдная Застyпнице, нынешнее пpиемши пpиношение, от всякия избави напасти всех, и бyдyщия изыми мyки, о Тебе вопиющих: Аллилyиа.

Молитва О чем молить Тебя, чего просить у Тебя? Ты ведь все видишь, знаешь Сама, посмотри мне в душу и дай ей то, что ей нужно. Ты, все претерпевшая, все премогшая, — все поймешь. Ты, повившая Младенца в яслях и принявшая Его Своими руками со Креста, Ты одна знаешь всю высоту радости, весь гнет горя. Ты, получившая в усыновление весь род человеческий, взгляни и на меня с материнской заботой. Из тенет греха приведи меня к Своему Сыну. Я вижу, слезу, оросившую Твой лик. Это надо мной Ты пролила ее и пусть смоет она следы моих прегрешений. Вот я пришел, я стою, я жду Твоего отклика, о Богоматерь, о Всепетая, о Владычице! Ничего не прошу, только стою пред Тобой. Только сердце мое, бедное человеческое сердце, изнемогшее в тоске по правде, бросаю к Пречистым ногам Твоим, Владычица! Дай всем, кто зовет Тебя, достигнуть Тобою вечного дня и лицем к лицу поклониться Тебе. Аминь

Державная неба и земли Владычица

Автор Марина Кравцова

15.03.2012 11:00

Религия » Религии России » Православие

2 марта по старому стилю или 15 марта по новому — страшная дата 1917 года… День, когда последний русский император Николай II Александрович под давлением ближайшего окружения принял тяжкое и, увы, роковое решение — отрекся от престола Российского. Тогда — в пользу младшего брата, Великого Князя Михаила Александровича, не представляя, как глубоко пустило корни предательство.

С 1914 года Россия находилась в состоянии войны. Окружение государя убеждало его в том, что вся страна требует его отставки, что эта жертва приведет Россию к победе. Николай Второй был полностью изолирован от страны, и именно второго марта по старому стилю он написал в дневнике: «Суть та, что во имя спасения России, удержания армии на фронте и спокойствия нужно сделать этот шаг. Я согласился… В час ночи уехал из Пскова с тяжелым чувством пережитого. Кругом измена и трусость, и обман».

Но в тот же день обретена была Державная икона Божией Матери в царской порфире и короне, со скипетром и державой — символами царской власти! — в руках. И это был, несомненно, знак свыше.

В 1917 году, 13 и 26 февраля, крестьянке Евдокии Андриановой привиделись необычайные сны. В первый раз таинственный голос сказал ей: «Есть в селе Коломенском большая черная икона. Ее нужно взять, сделать красной. И пусть молятся». После этого сновидения верующая женщина начала усиленно молиться о толковании его и вышнем вразумлении.

26 февраля ей приснилась белая церковь с величественно восседающей в ней царственной Женой. Андрианова поняла, что Жена эта — Пресвятая Богородица…

Потрясенная Евдокия второго марта, в тот же день, что государь отрекся от престола, отправилась из села Перервы, где жила, к настоятелю церкви в селе Коломенском (в то время село в Московской губернии) — храма Вознесения Христова. Священник, выслушав Андрианову, показал ей все иконы, что были в храме, но той, что видела женщина в сновидении, среди них не оказалось. Тогда батюшка вспомнил о большой иконе, хранящейся в церковном подвале…

Иконография иконы

Изображение иконы «Державная» уникально. Мать восседает на троне и удерживает Богомладенца у себя на коленях, Его десница поднята в жесте благословения. Мария И Иисус своими ликами обращены к молитвенникам.

На верхней части образа в виде старца изображен Бог-Отец, Он как бы выходит из туманного облака, которое являет собой символ Небесного Царствия. Его правая рука тоже поднята в благословляющем жесте.

Голова Богородицы увенчана короной — царственным знаком, поэтому Божия Матерь именуется Царицей Небесной. Это достоинство основано на том, что Пречистая есть Мать Самого Иисуса Христа, Превечного Бога. Ее «подчиненное» положение Воле Сына выражено тем, что корона возложена на Ее голову поверх красного мафория — длинного одеяния, спускающегося с головы до пят. Он же служит символом материнства. Красный цвет одеяния символизирует царственную власть. А скипетр и держава, удерживаемые в руках, также указывают на царственное достоинство Богоматери.

Икона Державной Богоматери, село Коломенское