Редкие Богослужебные тексты
Служба cщмч. Фаддею Тверскому
Память — 18(31) декабря
На велицей вечерни
Стихиры на Господи воззвах, глас 2:
Сосуд священнейший Духа Божественнаго быв, иерарше достославне, душу очистив от страстей, в путех гоним, в темницах заключаем, принеслся еси яко жертва чиста Христу.
Твердый служителю Церкве Христовы, любителю монашескаго жития, образе кротости и незлобия, священномучениче Фаддее, предстоя днесь Престолу Вседержителя, поминай паству твою, да вси ходатайством твоим получим велию милость.
Священномучениче отче наш Фаддее, украси=л еси Церковь Христову страдании твоими, яко добр воин Иисус Христов, сего ради молим тя: молитвами твоими не остави ны.
Слава, глас :
Венцем славы украшаем и Престолу Божию предстоя, Божественнаго света исполняем, священномучениче Фаддее преславне, моли спасти чтущия тя.
И ныне, глас 6:
Пресвятая Дево, Царице небесе и земли, Мати Христа Бога нашего, молитвами возлю=бльшаго Тя святителя Фаддея, покрый нас покровом милосердия Твоего.
Стихиры на литии, глас 8:
Всечестную память твою празднующе, сошедшеся днесь в храм сей святый, воспеваем житие и мученическую кончину твою, святителю Фаддее досточудне.
Ты еси прибежище наше и покров спасения, ты еси предстатель о всех нас, темже тя почитаем купно со другом твоим Патриархом Тихоном; моли спастися душам нашим.
Слава: Славяще днесь страдания твоя, святителю Христов Фаддее, тя молим: молися ко Господу да укрепит веру нашу.
И ныне: Царице наша Преблагословенная, к Тебе прибегаем и молим: молитвами светильника Церкве Христовы просвети души наша.
Стихиры на стиховне, глас 6:
Священномучениче Фаддее, похвало Церкве Святей, молися Христу Богу о пастве твоей, да спасет Господь души наша.
Стих: Честна пред Господем смерть преподобных Его. Светильниче Церкве Христовы, отче наш Фаддее, наслаждаяся ныне светом Божественныя славы, молися о всех нас.
Стих: Блажен муж бояйся Господа, в заповедех Его восхощет зело.
Слава и ныне, Богородичен:
Владычице мира, Упование и Предстательство верных, приими молитвы раб Твоих, чтущих память светлую Фаддея священномученика.
Тропарь, глас 1:
Хвала Богу и жертва живая житие твое, священномучениче Фаддее, явися. Постом, бдением и молитвою небесная дарования приим, многим добрый помощник и утешитель бысть. Пастырскою мудростию и тихостию нрава украшен, лукавствия врагов Христовых препобедил еси. Слава Давшему тебе во страданиих крепость, слава яко мученика Венчавшему тя, слава Действующему тобою всем исцеления.
На утрени
На Бог Господь, тропарь дважды. Слава и ныне, Богородичен:
По первом стихословии седален:
Проповедниче пламенный истины Христовы, священномучениче Фаддее приснопамятне, волю неколебиму явивый и духа величие во страдании твоем, моли о всех нас.
Слава и ныне, Богородичен:
По слову Твоему блажат Тя вси роди, Пресвятая Владычице наша Богородице, сего ради умильно взываем: радуйся, всего мира очищение.
По втором стихословии седален:
Православия защитниче и столпе истинный Церкве Христовы, отче наш Фаддее, сохраняй стадо, еже упасл еси.
Слава и ныне, Богородичен:
Возвыси благодать Твою, Чистая, яко да спасемся чтущии Тя.
По полиелеи седален, глас 6:
Днесь восхваляем светильника новаго Тверския земли, истиннаго святителя Божия, мужа крепости и разума, моляще просветити души наша.
Слава и ныне, Богородичен:
Святая Преблагословенная Дево Богородице, яви Матернее Свое предстательство пред Господем, Сыном Твоим во еже грехов оставление даровати нам.
По 50-м псалме стихира, глас 6:
Достойно восхвалим днесь Архипастыря-молитвенника, последователя делания апостольскаго великаго, священномученика Фаддея достославнаго, умиленно просяще молитвами его помиловати души наши.
Канон глас 1
Песнь 1
Горькия работы избавлься Израиль, непроходимое пройде яко сушу: врага зря потопляема, песнь яко Благодетелю поет Богу, чудодеющему мышцею высокою, яко прославися. Архиерея великаго тя чтим, священномучениче Фаддее преславне, яко да молитвами твоими добре о Господе наше течение совершим.
Чудно житие твое бысть, священномучениче Фаддее, яко Ангели помощники имел еси во всех делех твоих.
Слава: Шествоваше путем крестным, егда Церковь Российская гонения претерпеваше; сего ради Господь возлюби тя.
Богородичен: Тя, Пречистую Матерь Божию, святитель честный Фаддей издетска возлюбил есть, егоже Помощница бысть чрез все течение земнаго служения его.
Песнь 3
Не мудростию и богатством да хвалится смертный своим, но верою Господнею, православно взывая Христу Богу, и поя присно: на камени Твоих заповедей утверди мя, Владыко.
Священномучениче Фаддее, святителю Христов, радуйся, ты бо еси наша радость неизреченная и Церкве Русския украшение всесветлое.
Тя святителя предивнаго почитают днесь людие земли Волынския и Тверския и радуются зело, имеюще тя великаго ходатая у Престола Бога Триединаго.
Слава: Празднику Воплощения Бога Слова грядущему, ты мученически скончал еси житие твое и веселишися со Небесными Силами, воспевающими славу в вышних Богу и на земли мир.
Богородичен: Обрадованная, приими молитву недостойных раб Твоих и помилуй стадо Твое, еже стяжала еси, Пренепорочная.
Седален:
Струю нам слова подаждь, Боже, и силу исповедати Тя, молитвами священномученика Фаддея преславнаго.
Слава и ныне, Богородичен:
Призри, Пречистая, спасти ны, да благодарно славим Тя, всемощную Заступницу рода христианскаго.
Песнь 4
Слыша древле Аввакум, Христе, чудный Твой слух, и страхом взываше: от юга Бог приидет, и Святый от горы приосененныя чащи, спасти помазанныя, слава силе Твоей Господи.
Се ныне стояще во храме Господни, притекаем к раце мощей твоих, отче Фаддее, и молим тя дати умиление сердцам нашим.
Видя злобу безбожных мучителей твоих, смирением противостал еси им, моля Христа Бога да не воздаст им по делом их.
Слава: Яко исполняяй волю Христову советы безбожных до конца отклонил еси и себе предал еси, священномучениче, быти утопляему во сквернах. Богородичен: Похвало Божественная священномученика Фаддея, Пресвятая Богородице Дево, радости неизреченныя сподоби ны, поющия Тя.
Песнь 5
Свет Твой незаходимый воссияй, Христе, в сердца верно поющих Тя, мир подавай нам паче ума, тем от нощи неведения ко дню светом Твоим текуще, славословим Тя, Человеколюбче.
Словом и делом явивый образ Архипастыря достойнаго, отче наш Фаддее, помози и нам званию христианскому верны быти.
Житием своим путь истинный показал еси ко Христу, святителю отче Фаддее, темже и нас укрепи молитвами пред Господем, да ноги наши твердо поставит во исповедании веры.
Слава: Егда приведен был еси пред судище беззаконных, кротостию отвергл еси клевету и свидетельствовал еси без страха истину исповедания твоего.
Богородичен: Недугующа телом и душею, посещения Матерняго от Тебе сподоби, Едина Богомати, яко Благаго Родительница.
Песнь 6
Очисти мя, Спасе, многа бо беззакония моя, и из глубины зол возведи, молюся: к Тебе бо воззопих, и услыши мя, Боже спасения моего. Житию твоему дивляхуся собратия твоя, священномучениче Фаддее прехвальне, но смирение твое возрасташе, гордость мира сего побеждая.
Не забуди нас, убогих, до конца, Церкве Тверския святителю и украшение, но моли Христа Бога нашего, да дарует нам терпение побеждати супостата.
Слава: Святителю предивне, не отвергл еси Господа, но следоваше стопам Его, сего ради Господь содела тя наследника блаженнаго упокоения.
Богородичен: Тя, Радость и Славу священномученика Фаддея, Богородице, молим верно: радости вечныя нас сподоби, поющих Тя присно.
Кондак. Духа небоязни и любве даде Пастыреначальник ти, святителю Фаддее, во страдании бо твоем благодарение Богу воздая, страждущия утешаше.
Икос.
Возсиял еси якоже солнцу заря, священномучениче Фаддее светоносне, темже твою память достойно славим и просим: моли Христа Бога грехов оставление нам даровати и в мире спастися.
Песнь 7
Проидоша яко чертог пещный пламень нестерпимый, иже за благочестие иногда, отроцы святии показавшеся яве, и согласно воспевающе песнь пояху: отцев Боже, благословен еси. Радуйся светлым торжеством, граде Твере, имея покровителя и пред Богом заступника. Мы же, раби твои припадающе вопием ти: угодниче Христов отче Фаддее, не премолчи о нас, тепле моляся ко Господу.
Красе=н был еси и земли Астраханстей, идеже показался еси проповедник веры истинныя. Темже дивящеся усердно взываем: радуйся, града Астрахани похвало неложная.
Слава: Светильника Церкве Христовы, поставленнаго на свещнице веры, сошедшеся вси воспоим.
Богородичен: Живых и мертвых Предстательнице, страсти сердец наших умертви, Всенепорочная.
Песнь 8
Чуда преестественнаго показа образ, огнеросная пещь древле: огнь бо не опали юныя дети, Христово являя от Девы Божественное Рождество, тем воспевающе воспоим: да благословит тварь вся Господа и превозносит во вся веки.
О твоея неизреченныя благостыни, Боже! Молитвами угодившаго Ти святителя Фаддея, услыши глас и воздыхание верно творящих память его.
Святый священномучениче Фаддее, пищи небесныя ныне наслаждаешися, Господа воспевающе: Боже отец наших, благословен еси.
Слава: Власть вязати и решити получивый, разреши множество зол наших, да возможем пети Господа: Боже отец наших благословен еси.
Богородичен: Никтоже погибе, Богородице Чистая, иже веру и надежду стяжа к Тебе православно.
Песнь 9
Неизглаголанные Девы таинство: небо бо сия и престол Херувимстий и светоносный показася, Христа Бога Вседержителя, Сию благочестно яко Богородицу величаем.
На стадо и Церковь, юже ты пасоше, священномучениче Фаддее, врази устремишася, но ходатайством твоим пред Богом сих посрами до конца.
Чада твоя собрашася в день мученическия кончины твоея и предстояще раце мощей твоих со хвалами мнозими величают тя.
Слава: Архиереи и священницы, монаси и мирстии, светло празднуйте досточудную память новомученика Церкве Российския, восхваляюще его в песнех и пениих духовных.
Богородичен: Умири мир, Христе, мольбами Чистыя Богоотроковицы, Юже священномученик Твой Фаддей, выну призываше.
Светилен. Провозвестника пламеннаго единой, соборней и апостольстей Церкве имуще и светильника светлаго Фаддея, сошедшеся радостно по достоянию восхвалим.
Слава и ныне, Богородичен: Призри на ны, Всепетая Богородице Дево, приемлющи недостойную молитву раб Твоих.
Стихиры на хвалитех, глас 2:
Днесь радость велия на небесех и в Церкви Божии на земли, и вси сошедшеся прославляем дивнаго святителя Фаддея, телом почивающаго во святем храме сем.
Ревности Божественныя исполненный, священномучениче Фаддее достохвальне, в тяжкая времена Отечествия нашего явился еси адамант веры Христовы.
Прославляюще истиннаго светильника заветов апостольских, священномученика Фаддея, вернии, возопиим: Христа Бога моли даровати Церкви единомыслие, мир и велию милость.
Слава и ныне, Богородичен:
Светлое пророческое сбытие, апостольская похвало, Ты еси Всечистая, просвети ны, рабы Твоя.
Молитва
О пречудный угодниче Христов, сокровище истинное и Церкве Российския красото, священномучениче отче наш Фаддее, ты от юности явил еси благодатныя дары: кротость, незлобие и смирение, и дух пламенный монашеский стяжал еси, созерцание же и богомыслие. Служением твоим архипастырским земли Тверскую, Волынскую, Астраханскую освятил еси. Гонения, заточения, страдания претерпев, собратий твоих утешаше, глаголя: «Не унывайте, с нами бо Христос». Ей, святче Божий, друже иже во святых отца нашего Патриарха Тихона, не остави нас, убогих, в молитвах твоих пред Престолом Триединаго Бога. Аминь.
Оценки современников
Сщмч. Фаддей, архиепископ Тверской
Свт. Тихон (Белавин), патриарх: «Знаете ли Вы, что владыка святой человек? Он необыкновенный, редкий человек. Такие светильники Церкви — явление необычайное. Но его нужно беречь, потому что такой крайний аскетизм, полнейшее пренебрежение ко всему житейскому отражается на здоровье. Разумеется, владыка избрал святой, но трудный путь, немногим дана такая сила духа».
Священник Ксенофонт Цендровский, главный идеолог и лидер обновленчества в Астрахани, принося публичное покаяние в грехе раскола, сказал следующее:
«Долго я коснел в грехе обновленчества. Совесть моя была спокойна, потому что мне казалось, что я делаю какое-то нужное и правое дело. Но вот я увидел Владыку Фаддея; я смотрел на него и чувствовал, как в душе моей совершается какой-то переворот. Я не мог вынести чистого, проникновенного взгляда, который обличал меня в грехе и согревал всепрощающей любовью, и поспешил уйти. Теперь я ясно сознавал, что увидел человека, которому можно поклониться не только в душе, но и здесь, на Ваших глазах».
Тропарь, глас 1
Хвала Богу и жертва живая житие твое, священномучениче Фаддее, явися. Постом, бдением и молитвою Небесная дарования приим, многим добрый помощник и утешитель бысть. Пастырскою мудростию и тихостию нрава украшен, лукавства врагов Христовых препобедил еси. Слава Давшему тебе во страданиих крепость, слава, яко мученика, Венчавшему тя, слава Действующему тобою всем исцеления.
