Храм Успения Божией Матери в г. Моздок: Молитвы перед иконой Пресвятой Богородицы Моздокская-Иверская

Пред иконой Пресвятой Богородицы «Моздокская-Иверская» молятся о защите от междоусобной брани, об избавлении от скорби и печали, об исцелении недугов душевных и телесных, при тяжелых обстоятельствах.

Тропарь Божией Матери пред чудотворной иконой Ее Моздокской, глас 1:

От святыя иконы Твоея, о Владычице Богородице, / исцеления и цельбы подаются обильно, / с верою и любовию приходящим к ней. / Тако и мою немощь посети, / и душу мою помилуй, Благая, // и тело исцели благодатию Твоею, Пречистая.

Кондак Божией Матери пред чудотворной иконой Ее Моздокской, глас 6:

Не имамы иныя помощи,/ не имамы иныя надежды,/ разве Тебе, Владычице,/ Ты нам помози,/ на Тебе надеемся/ и Тобою хвалимся, // Твои бо есмы раби, да не постыдимся.

Акафист Моздокской иконе Пресвятой Богородицы:

Кондак 1

Взбранной Воеводе, Владычице нашей Богородице, похвальная пения приносим Ти раби Твои, яко честным образом Твоим милости источник стяжавшии, Ты же, Госпоже, яко благосердая Мати, буди неотступна милостию Твоею от нас, да зовем Ти: Радуйся, Милосердая, милости нам иконою являющая.

Икос 1

Ангелов лицы сопредсташа, Небесная Царице, окрест святыя иконы Твоея, благодатию Тобою прославленныя. Тем же и мы, взирающе на икону Твою, в божественных храмах нас осеняющую, почитаем ю, преклоняем колена пред величеством Твоим, Владычице, и умильно воспеваем сице: Радуйся, Небесная Царице, Мати Господа небеси и земли, Радуйся, архангелов и ангелов Владычице, Радуйся, горних сил величание, Радуйся, человеческих ликостояний похваление, Радуйся, праведных душ сладосте, Радуйся, живущих в Бозе умиление, Радуйся, о нас пред Богом предстательнице, Радуйся, божественныя благости подательнице, Радуйся, Милосердая, милости нам иконою являющая.

Кондак 2

Вместилище святое силы Божия икону Твою, Богомати, Тамара, царица Иверская, принесе людям Осетии. Пришествием убо образа сего Ты, Пречистая Богородице, вселилася еси в них, яко благосердая Мати, ущедряющи благочестно почита-ющих Тя и воздвизающи их воспевати Богу: аллилуиа.

Икос 2

Разумне исповедуем дивное промышление Божие о стране нашей, ей же подобие Иверския иконы Богоматере, благодатию прославленное, даровася. Тем же, благодаряще Тя, Владычице, за милость твою к роду нашему, воспеваем сице: Радуйся, щедроты Твоя на нас изливающая, Радуйся, Твоею благостынею нам благодеющая, Радуйся, во всякой нужде нам помогающая, Радуйся, надежду нас недостойных не отвергающая, Радуйся, уповающих на Тя помощию не оставляющая, Радуйся, силою врачевания икону Твою знаменующая, Радуйся, тою источники чудес источающая, Радуйся, ею же немощи наша исцеляющая, Радуйся, Милосердая, милости нам иконою являющая.

Кондак 3

Сила Вышняго осеняше страну осетинскую, егда икона Пречистыя Богоматере прииде в ню, пребыванием освящающая землю, к созданию храмов святых воздвизающи, да славится имя Триипостаснаго Бога, явлением Твоим, Владычице, и да воспевают Ему: аллилуиа.

Икос 3

Имущи премногую милость к Кавказу, Пресвятая Владычице, устроила еси в стране нашей иконы Твоея благодатное утверждение. Охраняй убо область сию и всю державу Российскую, да в мире и тишине воспеваем Ти сице: Радуйся, предстательнице к Богу, мир спасающая, Радуйся, хранительнице, державу Российскую покрывающая, Радуйся, христиан во благочестии утверждающая, Радуйся, земное житие наше добре устрояющая, Радуйся, праведно движимый на ны гнев Божий утоляющая, Радуйся, Господа на милость к нам преклоняющая, Радуйся, Благодатию Сына Твоего нас осеняющая, Радуйся, Милосердая, милости нам иконою являющая.

Кондак 4

Буря злостраданий и бед опустошаше страну осетинскую, егда нечестивии татары огнем и мечем по ней прохождаху. Ищуще спасения от них, людие Куртатинския области от гор под сень державы Российския преселяхуся, грядуще на новое местожительства, взяша с собою икону Твою, Богомати, да и оное Тобою освятится, ограждай убо, Владычице, Твоим покровом и наше жительство, да, осеняеми Тобою, взываем к Богу: аллилуиа.

Икос 4

Слышав пастырь паствы своея пришествие к Моздоку иконы Божия Матере, устрояет церковь, в ней же поставляет святую икону и священники утверждает, да выну прославляюще Богоматерь, вопиют Ей: Радуйся, святых храмов благодатию наполнение, Радуйся, домов наших небесное благословение, Радуйся, святых обителей покров и защищение, Радуйся, всех верных прибежище и утешение, Радуйся, спасительную веру в стране нашей утверждающая, Радуйся, благочестие в земли нашей насаждающая, Радуйся, во благонравии возрастати нам помогающая, Радуйся, в добрых делех преспевающих укрепляющая, Радуйся, Милосердая, милости нам иконою являющая.

Кондак 5

Боготечная звезда явися икона Твоя, Богомати, страну кавказскую обтекающи и сущих во тьме неведения светом Боговедения озаряюще, скорбящих радостию исполняющи, ищущих помощи Твоея утешающи благодатию Сына Твоего и Бога, Ему же благодарственне вопием: аллилуиа.

Икос 5

Видевше людие града Моздока икону Твою, от места их не двигшуюся, со умилением уразумеша, яко сим проявися великое Твое к ним благоволение и тем показуеши святую волю Твою. Благоволи убо, Пречистая, показати и нам милость Твою, да ею ущедряеми, со благодарением воспеваем Ти хвалы сия: Радуйся, матернею любовию нас возлюбившая, Радуйся, иконою Твоею нас сладце утешающая, Радуйся, источник благодати Тою открывающая, Радуйся, милосердия двери нам отверзающая, Радуйся, обилие милости нам изливающая, Радуйся, усердныя наша молитвы приемлющая, Радуйся, воздыхания сердечная послушающая, Радуйся, скорое утешение подати поспешающая, Радуйся, Милосердая, милости нам иконою являющая.

Кондак 6

Проповедует чудеса Твоя и милости область кавказская, яко дивно оградила еси покровом Твоим чудотворную икону Твою от огненнаго запаления, объявшаго церковь, в ней же святая икона пребываше. Трижды бо, церкви возгораемей, людие икону Твою на горе близ церкви неврежденну обретаху. Тем же и мы Тебе вопием: о, Пресвятая Владычице, призри всемилостивым оком Твоим и на нас, предстоящих пред пречистым образом Твоим, и молитвами Твоими избави нас от запаления бед и от пламене огня вечнаго, да с веселием поем Богу: аллилуиа.

Икос 6

Возсияти свету боговедения в древней Осетии изволяющи, рукою царицы Тамары святую икону Твою в ню послала еси и по сих силою и чудесы Тую прославила еси, и тако уверившеся о Твоем промышлении, Пречистая, люди Твоя соблюдающем, благодарственне прославляем Тя сице: Радуйся, икону Твою из пламене чудесно сохранившая, Радуйся, сию многими чудесы в стране нашей прославившая, Радуйся, молящимся пред иконою Твоею здравие подавающая, Радуйся, уповающим на Тя спасение дарующая, Радуйся, от христианских родов ублажаемая, Радуйся, прославляющих Тя прославляющая, Радуйся, благочестивых чувства услаждающая, Радуйся, подвизающихся в вере благодатне посещающая, Радуйся, Милосердая, милости нам иконою являющая.

Кондак 7

Хотяще людие осетинстии в кавказскую область преселитися достигоша града Моздока, носяще чудотворную икону Твою, Богомати. Нощию от колесницы, вней же святая икона пребываше, небесный свет возсия, и то слышав, епископ Гаий со множеством народа исшед, поклоняшеся пред нею до земли, яко Тебе Самей, Пречистая Богородице, молебное пение творя и взывая Богу: аллилуиа.

Икос 7

Новое место пребывания святыя иконы Твоея чудесным знамением и откровением епископу Гаию уверила еси. Како убо изречем Твою к нам любовь, Богородице, и кто возглаголет силы Твоя, дарованныя иконе Твоей? Обаче приими песнь хвалы и благодарения сицевую: Радуйся, во граде Моздоке чудотворною иконою пребывати благоволившая, Радуйся, и прочия грады и веси пренесением иконы заступлением Твоим не оставляющая, Радуйся, ею на Тя надеющихся возвеселяющая, Радуйся, иконою Твоею от всякаго зла нас сохраняющая, Радуйся, тою аки облаком светлым нас покрывающая, Радуйся, любы к нам неиссякающая, Радуйся, милости Своя к нам умножающая, Радуйся, грехи наша благостию побеждающая, Радуйся, Милосердая, милости нам иконою являющая.

Кондак 8

Странное чудо избрания Тобою, Владычице, новаго места вселения иконы Твоея удивляет умы. Не точию бо свет в нощи облиста место стояния колесницы с иконою Твоею, но и наутрие, егда людие, воздвигшеся далечайше идти, волы своя в колесницу впрягоша, тии не могоша повлещи ю, аще и много биени бяху. И слышавше окрест живущии о таковем знамении на месте пребывания Твоего, стекошася во множестве, поклоняющеся иконе Твоей и воспевающе Богу: аллилуиа.

Икос 8

Вси православнии людие славят имя Твое, Богородице, честным бо предстательством Твоим чудесную помощь нам являеши. Дивна суть дела Твоя, и дивна пресвятая икона Твоя, пред нею же припадающе, с верою и упованием глаголем Ти сице: Радуйся, заступнице роду христианскому, от Бога дарованная, Радуйся, пред Господем о нас ходатайствующая, Радуйся, молитвы о нас Тому простирающая, Радуйся, прошения верных к Сыну Своему и Богу приносящая, Радуйся, престолу благости Его матерски о нас предстоящая, Радуйся, благодать смирения и терпения нам подавающая, Радуйся, Божие к нам грешным благоволение, Радуйся, нас недостойных пред Богом дерзновение, Радуйся, Милосердая, милости нам иконою являющая.

Кондак 9

Всякое естество ангельское, видя Тя, Богородительнице, у престола Сына Твоего предстоящую и за христиан молящуюся, восхваляет Тя, людие же града Моздока, прияше святую икону Твою аки некое небесное сокровище, прославляют Всевышняго Господа, чудотворную силу ей даровавшаго, и воспевают Ему: аллилуиа.

Икос 9

Витийство человеческое не возможет по достоянию благохвалити Тя, Пресвятая Богородице, и воспевати чудеса Твоя, от иконы являемая, обаче, благая сущи, приими от нас за премногую любовь к нам и милость хвалебное пение сие: Радуйся, верующих благая Заступнице, Радуйся, призывающих Тя непостыдное упование, Радуйся, благочестивых всевеселящее радование, Радуйся, труждающихся помощь и укрепление, Радуйся, обидимых скорое заступление, Радуйся, гонимых покров и защищение, Радуйся, изнемогающих крепость и утверждение, Радуйся, болящих благонадежное посещение, Радуйся, Милосердая, милости нам иконою являющая.

Кондак 10

Спасти хотящи многи люди от бед и скорбей, источаеши, Богомати, неоскудный источник милости от Твоея Иконы роду нашему, тою, аки Тебе Самей сущей, грады и веси области нашея обтекающи и в них чтущим Тя полезное прошение исполняющи, тем же, прославляюще Бога, давшаго нам благодать таковую, вопием Ему: аллилуиа.

Икос 10

Стена еси верным, Богородице Дево, и заступление всем к Тебе прибегающим, ибо небесе и земли Творец, на руку Твоею носитися благоволивый, приемлет Тя, о людех молебне руце простирающую. Буди убо стена и покров от всех врагов видимых и невидимых и нам, ко пречестней иконе Твоей с верою припадающим, да вопием Тебе: Радуйся, от обстояний и бед нас сохраняющая, Радуйся, от потопления скорбей нас изымающая, Радуйся, искушения душевредная далече отгоняющая, Радуйся, вражды на благосердие прелагающая, Радуйся, на милосердие нас подвизающая, Радуйся, любити друг друга наставляющая, Радуйся, во непорочном житии верных укрепляющая, Радуйся, присноблаженная, блаженство и нам уготовляющая, Радуйся, Милосердая, милости нам иконою являющая.

Кондак 11

Пение всякое побеждается, спростретися тщащееся к явлением благодати, присно бываемым от святыя и чудотворныя иконы Твоея, Богородице, якоже бо скорая помощница, недуги исцеляеши, от бед избавляеши на всяком месте с верою Тя призывающих и вопиющих Богу: аллилуиа.

Икос 11

Светоприемную свещу зрим святую икону Твою, Богомати, во области кавказстей благодатию Твоею возженную, всю страну просвещающую и многих к свету Своему на спасение душ и телес привлекающую, тем же вопием Ти сице: Радуйся, Бога с человеки соединяющая, Радуйся, нас земнородных к Богу приближающая, Радуйся, о кающихся пред Богом предстательствующая, Радуйся, призывающих Тя сохраняющая и спасающая, Радуйся, падших Твоею благостию возставляющая, Радуйся, отчаянным надежду возвращающая, Радуйся, скорбьми грехи наша очищающая, Радуйся, печали наша благодатию утоляющая, Радуйся, Милосердая, милости нам иконою являющая.

Кондак 12

Благодатию Твоею, Пресвятая Богородице, якоже древле, и ныне притекающих к цельбоносней иконе Твоей не оставляеши, призывающим Тя благопоспешне вспомоществуеши, в печалех бедствующим помогаеши, и мы убо Твоим Заступлением спасаеми благодарными усты поем Богу: аллилуиа.

Икос 12

Поюще чудеса Твоя и милости, роду нашему явленныя, умильно припадаем к Пречистому образу Твоему, Владычице, и благоговейно лобызающе той, молим Тя: настави нас на путь спасения, буди Помощница и Заступница нам, вопиющим Тебе: Радуйся, верным утверждение и защищение, Радуйся, недужным и немощным исцеление, Радуйся, вдов и сирот покров и соблюдение, Радуйся, в нуждах сущих вспоможение, Радуйся, лишения терпящих довольством исполнение, Радуйся, скорбных матерей утешение, Радуйся, сиротствующих чад невидимое охранение, Радуйся, прибегающих к Тебе скорое посещение, Радуйся, Милосердая, милости нам иконою являющая.

Кондак 13

О, Всеблагая и Всемилосердая Мати, Пречистая Госпоже Богородице, приими моление сие, ныне Тебе приносимое, от нас грешных и недостойных рабов Твоих, ко образу Твоему, аки к Тебе Самей припадающих, призри милостивно на веру и упование наше, избави нас от бед и скорбей, подаждь нам руку помощи в жизни сей и будущия изми муки, да спасаеми Тобою выну вопием: аллилуиа, аллилуиа, аллилуиа.

(Этот кондак читается трижды, затем икос 1 и кондак 1)

Молитва ко Пресвятой Богородице пред Ее чудотворной иконою «Моздокская»:

О, Всемилостивая Госпоже Дево Богородице, услыши нас молящихся Тебе, и яви нам скорую милость Твою, Моли Сына Твоего избавитися нам от всякаго зла и сохрани люди, благочестно прибегающия и призывающия имя Твое святое, от всякия напасти, всех нас сохраняющи под кровом благости Твоея, ризою Твоею честною защити. Призри на всех нас призрением милостиваго Твоего заступления и молитвою Твоею сподоби нас со Христом жити и радости ангельския в небесных селениих наслаждатися. Ты бо еси, Госпоже, Слава небесных и Упование земных. Ты наша Надежда и Заступница всех, притекающих к Тебе и Твоея святыя помощи просящих, тем же всечестный образ Твой и рукою Твоею Держимаго Вседержителя видяще на иконе, радуемся грешнии, со умилением припадаем и любовию сей целуем, чающе, Госпоже, Твоими богоприятными молитвами в мире и благочестии земный путь прейти и небесныя безконечныя жизни достигнути и Трисиянному Богу со всеми, угодившими Ему, поклонятися во веки веков. Аминь.

Величание чудотворной иконе Божией Матери Моздокской:

Величаем Тя, / Пресвятая Дево, / и чтим образ Твой святый, / имже болезни наша врачуеши // и души к Богу возводиши.

Акафист Пресвятой Богородице пред иконой «Иверская»

А҆ка́ѳїстъ прест҃ѣ́й бцⷣѣ ꙗ҆вле́нїѧ ра́ди чꙋдотво́рныѧ є҆ѧ̀ і҆кѡ́ны і҆́верскїѧ.

Конда́къ а҃.

Взбра́нной воево́дѣ, влⷣчцѣ на́шей бцⷣѣ, похва̑льнаѧ пѣ̑нїѧ прино́симъ тѝ рабѝ твоѝ, ꙗ҆́кѡ прише́ствїемъ чⷭ҇тна́гѡ ѡ҆́браза твоегѡ̀ стѧжа́вшїи щи́тъ крѣ́пкїй, стѣ́нꙋ неѡбори́мꙋю и҆ стра́жа неꙋсы́пна. Ты́ же, ꙗ҆́кѡ и҆мꙋ́щаѧ держа́вꙋ непобѣди́мꙋю, покры́й и҆ защитѝ на́съ, влⷣчцѣ, ѿ всѣ́хъ врагѡ́въ ви́димыхъ и҆ невиди́мыхъ и҆ и҆зба́ви ѿ всѧ́кагѡ вре́да, дꙋше́внагѡ и҆ тѣле́снагѡ, да зове́мъ тѝ:

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

І҆́косъ а҃.

А҆́гг҃лъ предста́тель по́сланъ бы́сть рещѝ бцⷣѣ, є҆гда̀ падѐ є҆́й жре́бїй а҆пⷭ҇льскагѡ слꙋже́нїѧ въ землѝ і҆́верстѣй: не разлꙋча́йсѧ і҆ерⷭ҇ли́ма, жре́бїй же, тебѣ̀ па́дшїй, просвѣти́тсѧ въ послѣ̑днїѧ дни̑, ты́ же и҆́маши потрꙋди́тисѧ въ землѝ, ю҆́же тебѣ̀ бг҃ъ и҆зво́литъ. Тѣ́мже зове́мъ тѝ:

Ра́дꙋйсѧ, є҆́юже є҆ѵⷢ҇лїе бл҃говѣсти́тсѧ: ра́дꙋйсѧ, є҆́юже і҆́дѡльскаѧ пре́лесть ᲂу҆праздни́тсѧ.

Ра́дꙋйсѧ, є҆́юже вла́сть кнѧ́зѧ тьмы̀ разрꙋши́тсѧ: ра́дꙋйсѧ, є҆́юже црⷭ҇тво хрⷭ҇то́во ᲂу҆тверди́тсѧ.

Ра́дꙋйсѧ, па́дшихъ во тьмꙋ̀ і҆дѡлослꙋже́нїѧ къ свѣ́тꙋ є҆ѵⷢ҇лїа воззва́нїе: ра́дꙋйсѧ, ѿ ра́бства дїа́волꙋ, въ свобо́дꙋ сла́вы ча̑дъ бж҃їихъ приведе́нїе.

Ра́дꙋйсѧ, гото́ваѧ слꙋжи́тельнице сн҃а своегѡ̀ и҆ бг҃а: ра́дꙋйсѧ, послꙋша́нїемъ преслꙋша́нїе є҆́ѵы и҆сцѣлѧ́ющаѧ.

Ра́дꙋйсѧ, высото̀ добродѣ́телей: ра́дꙋйсѧ, глꙋбино̀ смиренномꙋ́дрїѧ.

Ра́дꙋйсѧ, є҆́юже невѣ́рнїи познаю́тъ творца̀: ра́дꙋйсѧ, є҆́юже вѣ́рнїи ᲂу҆сыновлѧ́ютсѧ ѻ҆ц҃ꙋ̀.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ в҃.

Ви́дѧщи ст҃а́ѧ дв҃а ди́вное и҆ но́вое ѡ҆ себѣ̀ промышле́нїе бж҃їе, ꙗ҆́кѡ раба̀ гдⷭ҇нѧ, при́снѡ гото́ваѧ твори́ти во́лю є҆гѡ̀, возопѝ: А҆ллилꙋ́їа.

І҆́косъ в҃.

Ра́зꙋмъ недоразꙋмѣва́емый глаго́ла а҆́гг҃льскагѡ, разꙋ́менъ тебѣ̀, пречⷭ҇таѧ, творѧ̀ гдⷭ҇ь, ᲂу҆пра́ви ше́ствїе твоѐ къ горѣ̀ а҆ѳѡ́нстѣй, и҆дѣ́же проповѣ́дасѧ тобо́ю є҆ѵⷢ҇лїе, и҆ та́кѡ ꙗ҆ви́сѧ жре́бїй тво́й. Мы́ же ра́достнѡ вопїе́мъ:

Ра́дꙋйсѧ, ѡ҆ст҃и́вшаѧ а҆ѳѡ́нъ свои́мъ прише́ствїемъ: ра́дꙋйсѧ, низложи́вшаѧ та́мѡ і҆́дѡлѡвъ.

Ра́дꙋйсѧ, насади́вшаѧ та́мѡ вѣ́рꙋ и҆́стиннꙋю: ра́дꙋйсѧ, невѣ́рїе ѿгна́вшаѧ.

Ра́дꙋйсѧ, въ жре́бїй себѣ̀ го́рꙋ сїю̀ и҆збра́вшаѧ: ра́дꙋйсѧ, бл҃года́ть семꙋ̀ мѣ́стꙋ ѡ҆бѣща́вшаѧ.

Ра́дꙋйсѧ, вѣ̑рнымъ, живꙋ́щымъ въ не́й, пода́тельнице земны́хъ бла̑гъ: ра́дꙋйсѧ, спорꙋ́чнице вѣ́чнагѡ и҆́хъ сп҃се́нїѧ.

Ра́дꙋйсѧ, те́плаѧ хода́таице ѡ҆ живꙋ́щихъ въ жре́бїи твое́мъ: ра́дꙋйсѧ, всѣ́хъ врагѡ́въ и҆́хъ ᲂу҆страше́нїе.

Ра́дꙋйсѧ, млⷭ҇ть сн҃а своегѡ̀ до сконча́нїѧ вѣ́ка мѣ́стꙋ семꙋ̀ ѡ҆бѣща́вшаѧ: ра́дꙋйсѧ, бл҃года́ть є҆гѡ̀ неѿстꙋ́пною бы́ти предре́кшаѧ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ г҃.

Си́ла вы́шнѧгѡ застꙋпле́нїемъ бг҃омт҃ре ѡ҆сѣнѝ ст҃ꙋ́ю го́рꙋ и҆ ᲂу҆дѡ́лїѧ и҆ дє́бри є҆ѧ̀, ꙗ҆́кѡ село̀ простра́нное показа̀, всѣ̑мъ въ и҆́ноческой жи́зни хотѧ́щымъ жа́ти сп҃се́нїе, внегда̀ пѣ́ти си́це: А҆ллилꙋ́їа.

І҆́косъ г҃.

И҆мѣ́ѧ промышле́нїе ѡ҆ жре́бїи свое́мъ, лю́дехъ і҆́верскїѧ землѝ, ᲂу҆стро́ила є҆сѝ въ мѣ́стѣ, и҆дѣ́же сама̀ къ а҆ѳѡ́нꙋ приста́ла є҆сѝ, ѻ҆би́тель ро́дꙋ и҆́хъ, въ ти́хое приста́нище и҆́щꙋщымъ сп҃се́нїѧ, хотѧ̀ дарова́ти є҆́й въ щи́тъ и҆ ѡ҆гражде́нїе і҆кѡ́нꙋ свою̀, да всѝ взыва́ютъ:

Ра́дꙋйсѧ, посла́вшаѧ проповѣ́дницꙋ є҆ѵⷢ҇лїѧ въ зе́млю і҆́верскꙋю: ра́дꙋйсѧ, ѡ҆брати́вшаѧ сїю̀ странꙋ̀ ѿ пре́лести і҆́дѡльской къ свѣ́тꙋ хрⷭ҇то́вꙋ.

Ра́дꙋйсѧ, ѻ҆́трасли неꙋвѧда́емыѧ розго̀, ди́внꙋю лозꙋ̀ ні́нѣ дарова́вшаѧ: ра́дꙋйсѧ, ѿ неѧ̀ произрасти́вшаѧ гро́здїе чꙋде́съ и҆ благі́ѧ вѣ́ры.

Ра́дꙋйсѧ, са́дъ дꙋхо́вный на а҆ѳѡ́нѣ насади́вшаѧ: ра́дꙋйсѧ, стрꙋю̀ и҆з̾ негѡ̀ просвѣще́нїѧ дх҃о́внагѡ странѣ̀ і҆́верстѣй и҆сточи́вшаѧ.

Ра́дꙋйсѧ, є҆ѵѳѵ́мїа златословє́сныѧ ᲂу҆ста̀: ра́дꙋйсѧ, тѡрни́кїа непобѣди́маѧ крѣ́посте.

Ра́дꙋйсѧ, всѣ́хъ бл҃гочести́выхъ ᲂу҆крѣпле́нїе: ра́дꙋйсѧ, и҆́нокѡвъ ѡ҆гражде́нїе.

Ра́дꙋйсѧ, ти́хое приста́нище и҆́щꙋщихъ сп҃се́нїѧ: ра́дꙋйсѧ, вѣ́чный поко́й и҆̀мъ ᲂу҆готовлѧ́ющаѧ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ д҃.

Бꙋ́рю внꙋ́трь и҆мѣ́ѧ помышле́нїй сꙋмни́тельныхъ, честна́ѧ вдови́ца, ꙗ҆́же въ нїке́и, смѧте́сѧ, зрѧ̀ копїе́мъ во́ина і҆кѡнобо́рца прободе́нꙋ ст҃ꙋ́ю и҆ чти́мꙋю і҆кѡ́нꙋ бг҃омт҃ре и҆ а҆́бїе и҆сточи́вшꙋ кро́вь, и҆ стра́хомъ ѡ҆бдержи́ма, да не порꙋ́гана бꙋ́детъ ст҃а́ѧ і҆кѡ́на, съ моли́твою слезоточа́щи вве́рже ю҆̀ въ мо́ре. Оу҆ви́дѣвъ же ю҆̀ прѧ́мѡ верхꙋ̀ воды̀ пꙋ́ть творѧ́щꙋ и҆ текꙋ́щꙋ къ за́падꙋ, возопѝ съ весе́лїемъ: А҆ллилꙋ́їа.

І҆́косъ д҃.

Ви́дѣша и҆́ноцы ст҃ы́ѧ горы̀ ꙗ҆́вльшїйсѧ въ мо́ри ꙗ҆́кѡ пла́мень, ꙗ҆́кѡ сто́лпъ ѻ҆́гненъ, є҆гѡ́же ве́рхъ досѧза́ше нб҃сѝ, ꙗ҆́кѡ со́лнце сїѧ́ющее, и҆ въ нощѝ притеко́ша къ кра́ю мо́рѧ, и҆ ви́дѣвше ст҃ꙋ́ю і҆кѡ́нꙋ бг҃омт҃ре, по мо́рю носи́мꙋю си́лою свы́ше, возопи́ша бл҃года́тнѣй:

Ра́дꙋйсѧ, кꙋпино̀, законополо́жникомъ предзри́маѧ: ра́дꙋйсѧ, сто́лпе ѻ҆́гненный, наставлѧ́ѧй сꙋ́щыѧ во тьмѣ̀.

Ра́дꙋйсѧ, лѣ́ствице, досѧза́ющаѧ до нб҃съ, є҆́юже сни́де бг҃ъ: ра́дꙋйсѧ, мо́сте, преводѧ́й сꙋ́щихъ ѿ землѝ на нб҃о.

Ра́дꙋйсѧ, зарѐ та́инственнагѡ днѐ: ра́дꙋйсѧ, ѕвѣздо̀, ꙗ҆влѧ́ющаѧ сл҃нце.

Ра́дꙋйсѧ, свѣ́тъ неизрече́нный роди́вшаѧ: ра́дꙋйсѧ, є҆́же ка́кѡ ни є҆ди́наго же наꙋчи́вшаѧ.

Ра́дꙋйсѧ, ѡ҆блече́ннаѧ въ сл҃нце, сїѧ́ющаѧ бл҃года́тїю и҆ сла́вою все́й вселе́ннѣй: ра́дꙋйсѧ, мо́лнїе, дꙋ́ши просвѣща́ющаѧ и҆ вѣ́рныхъ смы́слы ѡ҆зарѧ́ющаѧ.

Ра́дꙋйсѧ, свѣ́тлосте, во тьмѣ̀ свѣтѧ́щаѧ: ра́дꙋйсѧ, ꙗ҆́кѡ многосвѣ́тлое возсїѧва́еши просвѣще́нїе.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ є҃.

Бг҃оте́чнꙋю і҆кѡ́нꙋ свою̀ да́ти хотѧ̀ і҆́верстѣй ѻ҆би́тели, рекла̀ є҆сѝ, бг҃омт҃и, прпⷣбномꙋ гаврїи́лꙋ: и҆дѝ съ ли́комъ и҆́нокѡвъ къ бре́гꙋ мо́рѧ, сни́ди въ пꙋчи́нꙋ и҆ прїимѝ і҆кѡ́нꙋ мою̀. Ѻ҆́нъ же, вѣ́рою и҆ любо́вїю ѡ҆крилѧ́емь, по водѣ̀ а҆́ки по сꙋ́хꙋ ходѧ̀, прїѧ́тъ ю҆̀ во ѡ҆б̾ѧ́тїѧ своѧ̑, и҆ дости́гши сокро́вища, и҆ны̑мъ недостижи́магѡ, въ достоѧ́нїе и҆́нокѡвъ ро́да своегѡ̀ і҆́верскагѡ, веселѧ́сѧ поѧ́ше: А҆ллилꙋ́їа.

І҆́косъ є҃.

Ви́дѣша и҆́ноцы і҆́верстїи мно́гажды і҆кѡ́нꙋ бг҃омт҃ре и҆з̾ хра́ма въ верхꙋ̀ вра́тъ монасты́рскихъ, на стѣ́нꙋ гра́да незри́мою си́лою и҆знесе́ннꙋю, ᲂу҆жаса́хꙋсѧ и҆ стоѧ́хꙋ, зовꙋ́ще къ не́й такова̑ѧ:

Ра́дꙋйсѧ, ст҃ꙋ́ю і҆кѡ́нꙋ да́ти на́мъ и҆зво́лившаѧ: ра́дꙋйсѧ, покро́въ є҆ѧ̀ бы́ти на́мъ ѡ҆бѣща́вшаѧ.

Ра́дꙋйсѧ, любо́вь твою̀ къ ѻ҆би́тели на́шей показа́вшаѧ: ра́дꙋйсѧ, бл҃го́е ѡ҆ не́й промышле́нїе ꙗ҆ви́вшаѧ.

Ра́дꙋйсѧ, по́мощь на́ша въ чꙋжде́й странѣ̀: ра́дꙋйсѧ, въ стра́нствїи на́шемъ ᲂу҆тѣше́нїе.

Ра́дꙋйсѧ, бж҃їе къ на́мъ бл҃говоле́нїе: ра́дꙋйсѧ, на́ше къ бг҃ꙋ дерзнове́нїе.

Ра́дꙋйсѧ, сле́зъ на́шихъ и҆збавле́нїе: ра́дꙋйсѧ, си́рыхъ на́съ защи́тнице.

Ра́дꙋйсѧ, ѡ҆гражде́нїе на́ше: ра́дꙋйсѧ, є҆ди́на ра́досте на́ша.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ ѕ҃.

Проповѣ́дника творѧ́щи гаврїи́ла во́ли своеѧ̀, рекла̀ є҆сѝ къ немꙋ̀, влⷣчце: не прїидо́хъ храни́ма бы́ти ѿ ва́съ, но да бꙋ́дꙋ а҆́зъ храни́тельница ва́ша не то́кмѡ въ настоѧ́щемъ, но и҆ въ бꙋ́дꙋщемъ вѣ́цѣ. Сѐ даю̀ ва́мъ зна́менїе: до́ндеже зритѐ въ монастырѣ̀ і҆кѡ́нꙋ мою̀, не ѡ҆скꙋдѣ́етъ ва́мъ бл҃года́ть сн҃а моегѡ̀ и҆ млⷭ҇ть, да вопїю́тъ є҆мꙋ̀ всѝ: А҆ллилꙋ́їа.

І҆́косъ ѕ҃.

Возсїѧ̀ ра́дость ве́лїѧ слы́шавшымъ твоѧ̑, бг҃ома́ти, ѡ҆бѣтова̑нїѧ, и҆ тебѣ̀, нбⷭ҇нѣй врата́рницѣ, хра́мъ на вратѣ́хъ ѻ҆би́тели съ весе́лїемъ и҆́ноцы воздвиго́ша и҆ возопи́ша та́кѡ:

Ра́дꙋйсѧ, храни́тельнице на́ша въ настоѧ́щемъ вѣ́цѣ: ра́дꙋйсѧ, предста́тельнице на́ша въ бꙋ́дꙋщемъ.

Ра́дꙋйсѧ, стра́хꙋ бж҃їю на́съ наꙋча́ющаѧ: ра́дꙋйсѧ, на пꙋ́ть добродѣ́тели наставлѧ́ющаѧ.

Ра́дꙋйсѧ, дерзнове́нїе на́ше и҆ наде́ждо: ра́дꙋйсѧ, ᲂу҆пова́нїе на́ше и҆ покро́въ.

Ра́дꙋйсѧ, благоꙋтро́бїе сн҃а своегѡ̀ къ на́мъ преклони́вшаѧ: ра́дꙋйсѧ, бл҃года́ть є҆гѡ̀ неѡскꙋ́днѡ пребыва́ти съ на́ми возвѣща́ющаѧ.

Ра́дꙋйсѧ, ст҃ꙋ́ю і҆кѡ́нꙋ зало́гомъ млⷭ҇ти да́вшаѧ: ра́дꙋйсѧ, да́ръ чꙋдодѣ́йствїѧ є҆́й дарова́вшаѧ.

Ра́дꙋйсѧ, прило́гъ всѧ́кагѡ ѕла̀ ѿ ѻ҆би́тели ѿража́ющаѧ: ра́дꙋйсѧ, всемꙋ̀ бл҃го́мꙋ вхо́дъ ѿверза́ющаѧ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ з҃.

Хотѧ́щꙋ и҆ногда̀ ѕлочести́вомꙋ а҆ми́рѣ ѻ҆би́тель і҆́верскꙋю разори́ти и҆ ста́до и҆́нокѡвъ та́мѡ собра́нное разсѣ́ѧти, ско́рѡ позна̀ крѣ́пкое ѻ҆би́тели застꙋпле́нїе ѿ бг҃омт҃ре, ᲂу҆ви́дѣвъ кораблѝ своѧ̑ въ пꙋчи́нѣ мо́рѧ погрѧ́зшыѧ и҆ ра́тники и҆зги́бшыѧ. И҆ прише́дъ со смире́нїемъ, сребро̀ и҆ зла́то въ ѻ҆би́тель даѧ́ше, мл҃твы просѧ̀. И҆́ноцы же, ви́дѣвше сїѧ̑, возопи́ша къ бг҃ꙋ: А҆ллилꙋ́їа.

І҆́косъ з҃.

Нѡ́выѧ и҆ безчи́слєнныѧ чꙋдеса̀ показа̀ бг҃омт҃рь, въ ѻ҆би́тели ѡ҆скꙋде́нїе вїна̀, мꙋкѝ и҆ є҆ле́а восполнѧ́ющи, бѣснꙋ́ющыѧ и҆сцѣлѧ́ѧ, хрѡмы́мъ да́рꙋѧ хожде́нїе, слѣпы̑мъ прозрѣ́нїе и҆ всѧ́къ недꙋ́гъ врачꙋ́ѧ, да, ви́дѧще чꙋдеса̀ сїѧ̑, воспѣва́ютъ тебѣ̀:

Ра́дꙋйсѧ, взбра́ннаѧ воево́до, врагѝ побѣжда́ющаѧ: ра́дꙋйсѧ, ско́раѧ на по́мощь призыва́ющымъ тѧ̀.

Ра́дꙋйсѧ, не презира́ющаѧ моле́нїѧ на́шегѡ: ра́дꙋйсѧ, ѡ҆бѣща́нїѧ своегѡ̀ не ѿстꙋпа́ющаѧ.

Ра́дꙋйсѧ, ско́рбь ѻ҆би́тели въ ра́дость претворѧ́ющаѧ: ра́дꙋйсѧ, ѡ҆скꙋдѣ́нїе ѻ҆би́тели восполнѧ́ющаѧ.

Ра́дꙋйсѧ, слѣпы́хъ прозрѣ́нїе: ра́дꙋйсѧ, хромы́хъ хожде́нїе.

Ра́дꙋйсѧ, всѣ́хъ немощны́хъ цѣли́тельнице: ра́дꙋйсѧ, всѣ́хъ ско́рбныхъ ᲂу҆тѣ́шительнице.

Ра́дꙋйсѧ, ꙗ҆́кѡ не престае́ши промышлѧ́ющи и҆ сп҃са́ющи на́съ: ра́дꙋйсѧ, ꙗ҆́кѡ ѿ толи́кихъ бѣ́дъ и҆збавлѧ́еши на́съ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ и҃.

Стра́ннѡ покрыва́емꙋю ѿ і҆кѡ́ны бг҃омт҃ре ѻ҆би́тель і҆́верскꙋю слы́шавъ патрїа́рхъ ні́кѡнъ, вожделѣ̀ и҆ рѡссі́йстѣй странѣ̀ благода́ти є҆ѧ̀ стѧжа́ти прича́стїе: сегѡ̀ ра́ди созда́въ ѻ҆би́тель въ че́сть сла́внагѡ ѡ҆́браза, со тща́нїемъ и҆спросѝ и҆з̾ѡбраже́нїе чꙋдотво́рнагѡ ѡ҆́браза бг҃омт҃ре, да, покро́вомъ є҆ѧ̀ защища́еми, вопїю́тъ бг҃ꙋ: А҆ллилꙋ́їа.

І҆́косъ и҃.

Всѧ̀ сꙋ́щи въ вы́шнихъ, но и҆ ни́жнихъ не ѿстꙋпа́ѧ, бл҃гоизво́лила є҆сѝ, бг҃омт҃и, ꙗ҆́коже дре́вле а҆нтѡ́нїю дарова́сѧ благослове́нїе горы̀ а҆ѳѡ́нскїѧ на ᲂу҆твержде́нїе ѻ҆би́тели пече́рскїѧ, дарова́ти и҆ но́вой ѻ҆би́тели въ странѣ̀ рѡссі́йстѣй свою̀ блгⷣть, є҆́юже бл҃гослови́ла є҆сѝ а҆ѳѡ́нъ, въ подо́бїи чⷭ҇тна́гѡ ѡ҆́браза твоегѡ̀: тѣ́мже взыва́емъ тѝ:

Ра́дꙋйсѧ, страны̀ рѡссі́йскїѧ покро́ве, ши́ршїй ѻ҆́блака: ра́дꙋйсѧ, правосла́вныѧ вѣ́ры въ не́й ѡ҆гражде́нїе и҆ ᲂу҆твержде́нїе.

Ра́дꙋйсѧ, правосла́вныѧ цр҃кве непоколеби́мый сто́лпе: ра́дꙋйсѧ, є҆ресе́й и҆ раско́лѡвъ ѡ҆бличе́нїе.

Ра́дꙋйсѧ, свѣ́тлыми лꙋча́ми чꙋдотво́рныхъ і҆кѡ́нъ всю̀ странꙋ̀ ѡ҆зарѧ́ющаѧ: ра́дꙋйсѧ, да́ры и҆сцѣле́нїй и҆ млⷭ҇тей ѿ ни́хъ и҆сточа́ющаѧ.

Ра́дꙋйсѧ, врагѡ́въ ᲂу҆страше́нїе: ра́дꙋйсѧ, ст҃и́телей весе́лїе.

Ра́дꙋйсѧ, і҆ере́євъ похвало̀: ра́дꙋйсѧ, и҆́нокѡвъ наста́внице.

Ра́дꙋйсѧ, всегѡ̀ ро́да на́шегѡ сп҃се́нїе.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ ѳ҃.

Всѧ́ко тща́нїе и҆мꙋ́ще ѡ҆ написа́нїи чⷭ҇тна́гѡ ѡ҆́браза млⷭ҇тивыѧ врата́рницы, со́нмъ по́стникѡвъ і҆́верскихъ молє́бныѧ пѣ̑нїѧ соверша́етъ, водо́ю ѿ чꙋ́дныѧ і҆кѡ́ны ѡ҆мыва́етъ дскꙋ̀, на не́йже и҆́мать и҆з̾ѡбрази́тисѧ чⷭ҇тны́й ѡ҆́бразъ, и҆ прпⷣбнаго і҆амвли́ха ѡ҆свѧща́етъ, и҆́же подвиза́всѧ въ постѣ̀, мл҃твѣ и҆ бдѣ́нїи со все́ю бра́тїею, списа̀ ва́пы, ст҃о́ю водо́ю и҆ моща́ми ѡ҆сщ҃е́нными чⷭ҇тно́е и҆з̾ѡбраже́нїе бг҃омт҃ре, вы́нꙋ молѧ́сѧ и҆ вопїѧ̀ бг҃ꙋ: А҆ллилꙋ́їа.

І҆́косъ ѳ҃.

Виті̑ѧ многовѣща̑нныѧ, ꙗ҆́кѡ ры̑бы безгла̑сныѧ, ви́димъ ѡ҆ тебѣ̀, бцⷣе: недоꙋмѣ́ютъ бо, ка́кѡ по досто́инствꙋ похвали́ти всѧ̑ чꙋдеса̀ твоѧ̑, ꙗ҆влє́ннаѧ ро́дꙋ на́шемꙋ ѿ ст҃ы́ѧ твоеѧ̀ і҆кѡ́ны: є҆щѐ бо на пꙋтѝ въ рѡссі́йскꙋю странꙋ̀ сїѧ̀ чꙋдодѣ́йствоваше, бл҃гочести́вомꙋ манꙋ́илꙋ повелѣва́ѧ вы́кꙋпъ да́ти невѣ̑рнымъ, возбранѧ́ющымъ ше́ствїе ст҃ы́ѧ і҆кѡ́ны въ странꙋ̀ рꙋ́сскꙋю, и҆ сꙋгꙋ́бѡ є҆мꙋ̀ по́слѣжде ѿда́вши. Мы́ же, дивѧ́щесѧ, вѣ́рнѡ вопїе́мъ тѝ:

Ра́дꙋйсѧ, и҆сто́чниче чꙋде́съ неизчерпа́емый: ра́дꙋйсѧ, всѧ́кїѧ млⷭ҇ти пода́тельнице.

Ра́дꙋйсѧ, всегда̀ те́плаѧ ѡ҆ на́съ хода́таице къ бг҃ꙋ: ра́дꙋйсѧ, промышле́нїѧ є҆гѡ̀ ѡ҆ на́съ сокро́вище.

Ра́дꙋйсѧ, сꙋ́щымъ въ бѣда́хъ прибѣ́жище: ра́дꙋйсѧ, скорбѧ́щихъ ᲂу҆тѣше́нїе.

Ра́дꙋйсѧ, больны́хъ и҆сцѣле́нїе: ра́дꙋйсѧ, немощны́хъ ᲂу҆крѣпле́нїе.

Ра́дꙋйсѧ, вдѡ́въ застꙋпле́нїе: ра́дꙋйсѧ, сиро́тствꙋющихъ млⷭ҇рдаѧ мт҃и.

Ра́дꙋйсѧ, заблꙋжда́ющихъ на пꙋ́ть и҆́стины ѡ҆браще́нїе: ра́дꙋйсѧ, грѣ́шникѡвъ къ покаѧ́нїю воззва́нїе.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ і҃.

Спастѝ хотѧ̀ мнѡ́гїѧ лю́ди ѿ бѣ́дъ и҆ скорбе́й, и҆сточа́еши, бг҃омт҃и, неѡскꙋ́дный и҆сто́чникъ млⷭ҇ти ѿ своеѧ̀ і҆кѡ́ны ро́дꙋ на́шемꙋ: се́ бо и҆ въ сто́льномъ гра́дѣ москвѣ̀ бл҃га́ѧ врата́рница, ꙗ҆влѧ́ешисѧ всѣ̑мъ поклонѧ́ющымсѧ тебѣ̀, ско́рое вспоможе́нїе подава́ѧ, и҆ въ но́вой ѻ҆би́тели і҆́верстѣй бл҃года́ти стрꙋи̑ ѿ і҆кѡ́ны твоеѧ̀ и҆спꙋща́еши, и҆ во и҆ны́хъ градѣ́хъ, ѻ҆би́телехъ и҆ ве́сехъ чтꙋ́щымъ тѧ̀ поле́зное проше́нїе и҆сполнѧ́ющи. Тѣ́мже, прославлѧ́ѧ бг҃а, да́вшаго на́мъ бл҃года́ть таковꙋ́ю, вопїе́мъ є҆мꙋ̀: А҆ллилꙋ́їа.

І҆́косъ і҃.

Стѣна̀ є҆сѝ и҆́ноческомꙋ чи́нꙋ, бцⷣе, и҆ всѣ̑мъ, къ тебѣ̀ прибѣга́ющымъ: и҆́бо нб҃сѐ и҆ землѝ творе́цъ все́льсѧ въ дѣ́вственной ᲂу҆тро́бѣ твое́й, наꙋчѝ всѣ́хъ чистоты̀ и҆ цѣломꙋ́дрїѧ ревни́телей возглаша́ти тебѣ̀:

Ра́дꙋйсѧ, дѣ́вства сосꙋ́де и҆збра́нный: ра́дꙋйсѧ, чистѣ́йшїй ѡ҆́бразе цѣломꙋ́дрїѧ.

Ра́дꙋйсѧ, черто́же безсѣ́меннагѡ ᲂу҆невѣ́щенїѧ: ра́дꙋйсѧ, невѣ́сто неневѣ́стнаѧ.

Ра́дꙋйсѧ, сѣ́ѧтелѧ чистоты̀ ро́ждшаѧ: ра́дꙋйсѧ, вѣ́рныхъ гдⷭ҇ви сочета́вшаѧ.

Ра́дꙋйсѧ, въ бꙋ́ри и҆скꙋше́нїй ско́раѧ помо́щнице: ра́дꙋйсѧ, прило́ги врага̀ ѿража́ющаѧ.

Ра́дꙋйсѧ, мглꙋ̀ дꙋшевре́дныхъ страсте́й ѿгонѧ́ющаѧ: ра́дꙋйсѧ, по́мыслы ѡ҆чища́ющаѧ.

Ра́дꙋйсѧ, земны̑ѧ сла̑сти презира́ти наꙋча́ющаѧ: ра́дꙋйсѧ, къ го́рнемꙋ ᲂу҆мы̀ и҆ сердца̀ направлѧ́ющаѧ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ а҃і.

Пѣ́нїе всѧ́кое побѣжда́етсѧ, спростре́тисѧ тща́щеесѧ ко мно́жествꙋ мно́гихъ щедро́тъ твои́хъ: равночи́слєнныѧ бо песка̀ пѣ̑сни а҆́ще прино́симъ тѝ, влⷣчце на́ша бцⷣе, ничто́же соверша́емъ досто́йно, ꙗ҆̀же подава́еши на́мъ, ѡ҆ тебѣ̀ вопїю́щымъ: А҆ллилꙋ́їа.

І҆́косъ а҃і.

Свѣтопрїе́мнꙋю свѣщꙋ̀, сꙋ́щымъ во тьмѣ̀ бѣ́дъ ꙗ҆́вльшꙋюсѧ, зри́мъ ст҃ꙋ́ю і҆кѡ́нꙋ бг҃омт҃ре: невеще́ственный бо ѻ҆́гнь благода́ти прїе́млющи, лꙋча́ми чꙋде́съ всѣ́хъ ѡ҆зарѧ́етъ, наꙋча́ющи си́це взыва́ти бл҃гослове́ннѣй:

Ра́дꙋйсѧ, во всѧ́кихъ нꙋ́ждахъ ско́рое вспоможе́нїе: ра́дꙋйсѧ, въ печа́лехъ бы́строе ᲂу҆слы́шанїе.

Ра́дꙋйсѧ, ѿ ѻ҆гнѧ̀, меча̀ и҆ наше́ствїѧ и҆ноплеме́нныхъ на́съ и҆збавлѧ́ющаѧ: ра́дꙋйсѧ, ѿ гла́да и҆ напра́сныѧ сме́рти на́съ свобожда́ющаѧ.

Ра́дꙋйсѧ, ѿ ꙗ҆́звы и҆ всегꙋби́тельства сме́ртнагѡ на́съ соблюда́ющаѧ: ра́дꙋйсѧ, бѣ́дствꙋющымъ въ пꙋтѝ, на сꙋ́шѣ и҆ на вода́хъ внеза́пное вспоможе́нїе.

Ра́дꙋйсѧ, ꙗ҆́звъ дꙋше́вныхъ и҆ тѣле́сныхъ врачева́нїе: ра́дꙋйсѧ, ѡ҆ста́вленныхъ врача́ми въ своѝ рꙋ́ки прїе́млющаѧ.

Ра́дꙋйсѧ, милосе́рдаѧ ᲂу҆тѣ́шительнице всѣ́хъ скорбѧ́щихъ и҆ ѡ҆бремене́нныхъ: ра́дꙋйсѧ, не ѿверга́ющаѧ всѣ́хъ презрѣ́нныхъ и҆ ѿве́рженныхъ.

Ра́дꙋйсѧ, са́мыхъ ѿча́ѧнныхъ и҆з̾ ро́ва поги́бели и҆схища́ющаѧ: ра́дꙋйсѧ, и҆ менѐ, ѡ҆бнаже́ннаго до́брыхъ дѣ́лъ, не ѡ҆ставлѧ́ющаѧ свои́мъ покро́вомъ и҆ застꙋпле́нїемъ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ в҃і.

Бл҃года́ть да́ти восхотѣ́въ долгѡ́въ дре́внихъ, всѣ́хъ долгѡ́въ рѣши́тель человѣ́кѡмъ, прїи́де собо́ю ко ѿше́дшымъ тогѡ̀ благода́ти, и҆ раздра́въ рꙋкописа́нїе, дарова̀ на́мъ крѣ́пкое бг҃обл҃года́тныѧ хода́тайство, да вопїе́мъ всѝ моли́твами є҆ѧ̀: А҆ллилꙋ́їа.

І҆́косъ в҃і.

Пою́ще твоѧ̑ чꙋдеса̀, ꙗ҆влѧ́ємаѧ на́мъ въ жи́зни се́й, хва́лимъ тѧ̀, бцⷣе, ꙗ҆́кѡ млⷭ҇ти и҆сто́чникъ неисчерпа́емый. Но, припа́даѧ къ тебѣ̀ пред̾ чꙋдотво́рною і҆кѡ́ною твое́ю, мо́лимъ тѧ̀ смире́ннѡ, бꙋ́ди на́мъ покро́въ и҆ защище́нїе и҆ въ де́нь кончи́ны на́шеѧ, и҆ є҆гда̀ и҆́мамы предста́ти на сꙋ́дъ стра́шномꙋ прⷭ҇то́лꙋ сн҃а твоегѡ̀, да вопїе́мъ тѝ:

Ра́дꙋйсѧ, во сла́вѣ присѣдѧ́щаѧ прⷭ҇то́лꙋ сн҃а твоегѡ̀, и҆ та́мѡ на́съ воспомина́ющаѧ: ра́дꙋйсѧ, съ сн҃омъ твои́мъ и҆ бг҃омъ вѣ́чнѡ црⷭ҇твꙋющаѧ, и҆ ѡ҆ на́съ хода́тайствꙋющаѧ.

Ра́дꙋйсѧ, ᲂу҆пова́ющымъ на тѧ̀ коне́цъ живота̀ непосты́денъ да́рꙋющаѧ: ра́дꙋйсѧ, безболѣ́зненнꙋю и҆ ми́рнꙋю кончи́нꙋ ᲂу҆строѧ́ющаѧ.

Ра́дꙋйсѧ, мыта́рствъ го́рькихъ и҆збавле́нїе: ра́дꙋйсѧ, ѿ вла́сти кнѧ́зѧ воздꙋ́шнагѡ ѡ҆свобожде́нїе.

Ра́дꙋйсѧ, грѣхѡ́въ на́шихъ непоминове́нїе: ра́дꙋйсѧ, по гдⷭ҇ѣ ᲂу҆пова́нїе на́мъ бл҃же́нныѧ жи́зни.

Ра́дꙋйсѧ, ᲂу҆пова́ющымъ на тѧ̀, ѡ҆деснꙋ́ю сн҃а твоегѡ̀ стоѧ́нїе ᲂу҆строѧ́ющаѧ: ра́дꙋйсѧ, бл҃же́ннагѡ гла́са ѻ҆́нагѡ, нбⷭ҇нагѡ црⷭ҇твїѧ наслѣ́дїе ѡ҆бѣща́ющагѡ, слы́шати сподоблѧ́ющаѧ.

Ра́дꙋйсѧ, бл҃га́ѧ мт҃и, всѣ́хъ чтꙋ́щихъ тѧ̀ жи́ти съ собо́ю вселѧ́ющаѧ: ра́дꙋйсѧ, крѣ́пкаѧ наде́ждо вѣ́чнагѡ сп҃се́нїѧ всѣ̑мъ хрⷭ҇тїа́нѡмъ.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ г҃і.

Ѽ всепѣ́таѧ мт҃и, прест҃а́ѧ гпⷭ҇жѐ дв҃о бцⷣе! При́зри на на́съ, приносѧ́щихъ смире́ннѡ со слеза́ми ма̑лыѧ сїѧ̑ моли̑твы пред̾ пречⷭ҇тымъ твои́мъ ѡ҆́бразомъ и҆ всѐ ᲂу҆пова́нїе и҆ наде́ждꙋ возложи́вшихъ на тѧ̀, и҆ и҆зба́ви на́съ всѣ́хъ бѣ́дъ и҆ напа́стей въ животѣ̀ се́мъ, и҆ бꙋ́дꙋщыѧ и҆змѝ мꙋ́ки, да спаса́емїи тобо́ю, вопїе́мъ вы́нꙋ: А҆ллилꙋ́їа.

Се́й конда́къ глаго́ли три́жды, посе́мъ а҃-й і҆́косъ и҆ а҃-й конда́къ.

І҆́косъ а҃.

Ра́дꙋйсѧ, є҆́юже є҆ѵⷢ҇лїе бл҃говѣсти́тсѧ: ра́дꙋйсѧ, є҆́юже і҆́дѡльскаѧ пре́лесть ᲂу҆праздни́тсѧ.

Ра́дꙋйсѧ, є҆́юже вла́сть кнѧ́зѧ тьмы̀ разрꙋши́тсѧ: ра́дꙋйсѧ, є҆́юже црⷭ҇тво хрⷭ҇то́во ᲂу҆тверди́тсѧ.

Ра́дꙋйсѧ, высото̀ добродѣ́телей: ра́дꙋйсѧ, глꙋбино̀ смиренномꙋ́дрїѧ.

Ра́дꙋйсѧ, є҆́юже невѣ́рнїи познаю́тъ творца̀: ра́дꙋйсѧ, є҆́юже вѣ́рнїи ᲂу҆сыновлѧ́ютсѧ ѻ҆ц҃ꙋ̀.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Конда́къ а҃.

Ра́дꙋйсѧ, бл҃га́ѧ врата́рнице, двє́ри ра̑йскїѧ вѣ̑рнымъ ѿверза́ющаѧ.

Моли́тва.

Ѽ прест҃а́ѧ дв҃о, мт҃и гдⷭ҇а, цр҃и́це нб҃сѐ и҆ землѝ! Вонмѝ многоболѣ́зненномꙋ воздыха́нїю дꙋ́шъ на́шихъ, при́зри съ высоты̀ ст҃ы́ѧ твоеѧ̀ на на́съ, съ вѣ́рою и҆ любо́вїю покланѧ́ющихсѧ пречⷭ҇томꙋ ѡ҆́бразꙋ твоемꙋ̀. Се́ бо, грѣхмѝ погрꙋжа́емїи и҆ скорбьмѝ ѡ҆бꙋрева́емїи, взира́юще на тво́й ѡ҆́бразъ ꙗ҆́кѡ живѣ́й тѝ сꙋ́щей съ на́ми, прино́симъ смирє́ннаѧ молє́нїѧ на̑ша. Не и҆́мамы бо ни и҆ны́ѧ по́мощи, ни и҆на́гѡ предста́тельства, ни ᲂу҆тѣше́нїѧ, то́кмѡ тебѐ, ѡ҆ мт҃и всѣ́хъ скорбѧ́щихъ и҆ ѡ҆бремене́нныхъ! Помозѝ на́мъ, немѡщны́мъ, ᲂу҆толѝ ско́рбь на́шꙋ, наста́ви на пꙋ́ть пра́вый на́съ, заблꙋжда́ющихъ, ᲂу҆врачꙋ́й и҆ спасѝ безнаде́жныхъ, да́рꙋй на́мъ про́чее вре́мѧ живота̀ на́шегѡ въ ми́рѣ и҆ тишинѣ̀ проводи́ти, пода́ждь хрⷭ҇тїа́нскꙋю кончи́нꙋ и҆ на стра́шнѣмъ сꙋдѣ̀ сн҃а твоегѡ̀ ꙗ҆ви́сѧ на́мъ млⷭ҇рдаѧ застꙋ́пница, да всегда̀ пое́мъ, велича́емъ и҆ сла́вимъ тѧ̀, ꙗ҆́кѡ бл҃гꙋ́ю застꙋ́пницꙋ ро́да хрⷭ҇тїа́нскагѡ, со всѣ́ми ᲂу҆годи́вшими бг҃ꙋ. А҆ми́нь.