Страдание святых мучеников Тараха, Прова и Андроника – Жития святых свт. Димитрия Ростовского

Канон святым мученикам Прову, Тараху и Андронику Аназарвским

Пѣ́снь а҃.

І҆рмо́съ:

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре: і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.

Мꙋ́ченическими ᲂу҆кра́шени благода́тьми, вѣнцеда́телю хрⷭ҇тꙋ̀ на нб҃сѣ́хъ любо́вїю, мꙋ́чєницы, предстоитѐ, свѣ́томъ ѡ҆зарѧ́еми трисо́лнечнагѡ сїѧ́нїѧ, и҆ всѧ̑ просвѣща́ете вѣ́рою ва́съ блажа́щыѧ.

Въ гоне́нїи нече́стїѧ ꙗ҆ви́стесѧ всю̀ прогонѧ́юще ѕлочести́вꙋю пре́лесть, мꙋ́чєницы непобѣди́мїи, до́блественными пѡ́двиги, ꙗ҆́кѡ до́брїи во́ини, ꙗ҆́кѡ цр҃кве ᲂу҆тверждє́нїѧ и҆ ꙗ҆́кѡ и҆́стины держа́ва.

Смы́сленнымъ ра́зꙋмомъ, всемꙋ́дрїи, ѿрази́вше ѕло́бнꙋю бꙋ́рю, и҆ свирѣ́пѣющеесѧ мо́ре ѕлоче́стїѧ, дꙋ́ха ти́хостїю, къ приста́нищємъ преидо́сте небє́снымъ, ра́дꙋющесѧ.

Дꙋша́мъ мꙋ́ченикѡвъ ва́ши сра́дꙋютсѧ мꙋ́чєницы дꙋ́си на нб҃сѣ́хъ и҆́стиннѡ, про́ве и҆ а҆ндроні́че и҆ тара́хе блаже́ннїи: мꙋ́жески бо болѣ̑зни мꙋче́нїѧ претерпѣ́сте, побѣ́дами бжⷭ҇твенными прославлѧ́еми.

Бг҃оро́диченъ:

И҆́же ѻ҆ц҃ꙋ̀ и҆ дх҃ꙋ ст҃о́мꙋ сло́во собезнача́льное, въ дѣ́вственнꙋю ᲂу҆тро́бꙋ восхотѣ́въ всели́сѧ, и҆ пло́ть невра́щнѡ бы́сть, и҆ пострада́въ во́лею, мч҃ничєскаѧ бжⷭ҇твєннаѧ вѡ́инства вѣ́рою страда́ти ᲂу҆стро́илъ є҆́сть.

Пѣ́снь г҃.

І҆рмо́съ:

Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Крѣ́пкѡ гони́телю проти́вивсѧ, тара́хе, и҆ сокрꙋше́нїе лица̀ терпѧ̀ крѣпча́йше, чє́люсти сокрꙋши́лъ є҆сѝ мы́сленныхъ львѡ́въ, до́блественъ бы́въ си́лою дх҃а.

Великомꙋ́дреннымъ ра́зꙋмомъ, ра̑ны претерпѣ́лъ є҆сѝ по хребтꙋ̀ и҆ чре́вꙋ, мч҃ниче про́ве, растѧза́емь и҆ поджига́емь, и҆ рѡжны̀ пє́рси, и҆ бг҃осла̑внаѧ твоѧ̑ ᲂу҆ста̀ бїє́ма.

Ꙗ҆́кѡ а҆́гнецъ вознесе́нъ бы́въ, терпѣ́лъ є҆сѝ болѣ̑зни лютѣ́йшихъ ра̑нъ, мч҃ниче а҆ндроні́че, ѻ҆гнѧ̀ попале́нїѧ, и҆ и҆скорене́нїе зꙋбѡ́въ, и҆ бг҃осло́внагѡ твоегѡ̀ ѧ҆зы́ка ѿѧ́тїе.

Трисвѣ́тлы ꙗ҆́кѡ ѕвѣ́зды разꙋ́мныхъ сїѧ́нїй, всю̀, сла́внїи, тва́рь просвѣща́ете, тмꙋ̀ ѿгонѧ́ще многобо́жїѧ ле́сти, страстоте́рпцы мꙋ́чєницы свѣтови́днѣйшїи.

Бг҃оро́диченъ:

Ꙗ҆́кѡ добрꙋ̀, ꙗ҆́кѡ краснꙋ̀, и҆ ꙗ҆́кѡ и҆збра́ннꙋ, чⷭ҇таѧ, сло́во, и҆́же всѧ̑ ѡ҆сꙋществова́вшее, тѧ̀ и҆збра́въ, въ твою̀ непоро́чнꙋю и҆ бг҃опрїѧ́тнꙋю ᲂу҆тро́бꙋ восхотѣ́въ всели́сѧ пресꙋ́щественный.

Сѣда́ленъ, гла́съ и҃.

Ст҃ы́ѧ трⷪ҇цы крѣ́пкою воѡрꙋжи́вшесѧ вѣ́рою ю҆́ношески, а҆ндроні́къ, про́въ же и҆ всемꙋ́дрый тара́хъ, многобо́жїѧ ле́сти держа́вꙋ потреби́ша, и҆ лю́ди къ бжⷭ҇твеннѣй любвѝ привѧза́ша. тѣ́мъ побѣ̑дныѧ прїи́мше по́чєсти, ликѡ́мъ свеселѧ́тсѧ си́лъ безпло́тныхъ, къ ни̑мже вѣ́рою возопїи́мъ: моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть ва́шꙋ.

Бг҃оро́диченъ:

Премꙋ́дрость и҆ сло́во въ твое́мъ чре́вѣ заче́нши неѡпа́льнѡ, мт҃и бж҃їѧ, мі́рꙋ родила̀ є҆сѝ мі́ръ содержа́щаго: и҆ во ѡ҆б̾ѧ́тїѧхъ понесла̀ є҆сѝ всѧ̑ носѧ́щаго, пита́телѧ всѣ́хъ, и҆ творца̀ тва́ри. тѣ́мже молю́ тѧ, всест҃а́ѧ дв҃о, и҆ вѣ́рнѡ сла́влю тѧ̀, и҆зба́витисѧ мѝ ѿ прегрѣше́нїй: и҆ въ де́нь сꙋда̀, є҆гда̀ предста́ти и҆́мамъ предъ лице́мъ созда́телѧ моегѡ̀, влⷣчце дв҃о чи́стаѧ, твою̀ по́мощь тогда̀ пода́ждь мѝ: всѧ̑ бо мо́жеши, є҆ли̑ка хо́щеши, всепѣ́таѧ.

Крⷭ҇тобг҃оро́диченъ:

А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.

Пѣ́снь д҃.

І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Зако́нъ тво́й соблюда́юще сло́ве, мч҃ницы, беззако́нныхъ зако́ны возненави́дѣвше, небрещѝ тебѐ творца̀ повелѣва́ющыѧ, де́мѡнскими ᲂу҆хищре́ньми, и҆ всѐ претерпѣ́вше треволне́нїе мꙋ́къ, нбⷭ҇нꙋю тишинꙋ̀ полꙋчи́ша.

Любѧ̀ хрⷭ҇то́во и҆́го носи́ти подвы́йное на вы́и твое́й, є҆́юже ра́дꙋешисѧ сокрꙋша́емь: крⷭ҇тъ же же́злъ держа́вныѧ, тара́хе всебл҃же́нне, си́лы и҆мы́й, па̑личнаѧ ᲂу҆множє́нїѧ терпи́ши, взыва́ѧ: си́лѣ твое́й сла́ва, чл҃вѣколю́бче.

Ꙗ҆́кѡ си́ленъ бжⷭ҇твеннымъ бы́въ дх҃омъ, лы́стѡвъ твои́хъ болѣ́зненное мꙋ́жественнѡ, про́ве, сокрꙋше́нїе, и҆ ѻ҆че́съ и҆з̾ѧ́тїе претерпѣ́лъ є҆сѝ, просвѣща́емь зна́нїемъ трⷪ҇цы соверше́ннѣйше, и҆ съ вы́шними ли̑ки, мꙋ́чениче, сочета́ѧсѧ.

Ю҆́ношески мꙋ́чениче, предста́лъ є҆сѝ, а҆ндроні́че, предъ сꙋди́щемъ противлѧ́ѧсѧ врагꙋ̀ крѣ́пкѡ. тѣ́мъ ѿрѣ́заѧ лы́сты твоѧ̑, си́льнѣйша содѣва́ше тѧ̀, главꙋ̀ є҆гѡ̀ попира́юща, и҆ го́рнее тебѣ̀ ше́ствїе сотворѧ́юща.

Бг҃оро́диченъ:

Є҆ди́на бг҃а но́сиши во ᲂу҆тро́бѣ воплоща́ема, є҆́же бы́ти всѣ̑мъ подаю́щаго. є҆го́же на три́знищи не прекло́ннѡ и҆сповѣ́дающа пострада́ша бжⷭ҇твеннїи мч҃ницы, дв҃о бцⷣе препѣ́таѧ, а҆́гг҃лѡвъ чꙋ́до, и҆ де́мѡнѡвъ ꙗ҆́зва.

Пѣ́снь є҃.

І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Неꙋкло́ннїи пꙋтеше́ствєнницы стезѝ ᲂу҆́зкїѧ и҆ жесто́кїѧ бы́сте, напа́стей мно́жество ꙗ҆́кѡ пѣ̑ны морскі̑ѧ ѿрѣва́юще, ꙗ҆́кѡ неразсѣ́днїи столпѝ, сердца̀ страстоте́рпцы, ꙗ҆́кѡ на ка́мени вѣ́ры ᲂу҆тверди́вше.

Виті́йствꙋѧ бжⷭ҇твєннаѧ, и҆ бг҃осло́вѧ спаси́тєльнаѧ ᲂу҆чє́нїѧ, ᲂу҆сте́нъ терпи́ши растерза̑нїѧ, ᲂу҆ма̀ крѣ́постїю загражда́ѧ ᲂу҆ста̀, на бг҃а тара́хе мꙋ́чениче, вредосло́вїе глагѡ́лющаѧ сотво́ршаго.

На че́тверѡ протѧза́емь, и҆ ра̑нъ ꙗ҆́звами ѡ҆держи́мь, дꙋше́вное показꙋ́ѧ до́блественнѡ воста́нїе. тѣ́мже вѣнцено́сецъ ꙗ҆́вльсѧ съ тождестрада̑льники, про́ве, цр҃ю̀ всѣ́хъ предстои́ши.

Бг҃оро́диченъ:

Бо́льши го́рнихъ си́лъ є҆сѝ, сло́во поро́ждши ѻ҆́ч҃ее, дв҃о, собезнача́льное и҆ соприсносꙋ́щное: є҆гѡ́же свѣ́тлостьми, страстоте́рпцы ѡ҆зари́вшесѧ, безбо́жїѧ но́щь преидо́ша.

Пѣ́снь ѕ҃.

І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Ѻ҆рꙋ́жїе си́льнагѡ бы́вше вѣ́рою, сердца̀ ѕловѣ́рныхъ мꙋ́жески ᲂу҆ѧзви́сте, подви́гшесѧ на нѧ̀ до́блественнѡ страстоте́рпцы великоимени́тїи.

Ꙗ҆́кѡ дре́вле данїи́ла въ ро́вѣ ѕвѣ́рїе ᲂу҆стыдѣ́шасѧ: та́кѡ и҆ ны́нѣ крѣ́пкихъ ѻ҆рꙋ́жникѡвъ вѣ́ры на три́знищи ᲂу҆страши́шасѧ, ᲂу҆кроти́вшесѧ честны́ми и҆́хъ страда̑нїи.

Прободє́нымъ твои̑мъ ре́брѡмъ, влⷣко, то́жде ѡ҆бразꙋ́ѧ тара́хъ, прїе́млетъ въ ре́бра прободе́нїе, и҆ ѻ҆́цтомъ напаѧ́етсѧ, и҆ ѻ҆гне́мъ въ главꙋ̀ лю́тѣ попалѧ́етсѧ.

Бг҃оро́диченъ:

Заче́нши безъ сѣ́мене во ᲂу҆тро́бѣ превѣ́чнаго, чⷭ҇таѧ, и҆ родила̀ є҆сѝ пло́тїю є҆стество́мъ безпло́тнаго, и҆ млеко́мъ пои́ла є҆сѝ пита́ющаго всѣ́хъ, бг҃ома́ти неискꙋсобра́чнаѧ.

Конда́къ, гла́съ в҃.

Трⷪ҇цы на́мъ сла́вꙋ ꙗ҆ви́ша до́блїи хрⷭ҇тѡ́вы ѻ҆рꙋ́жницы и҆ мч҃ницы, съ тара́хомъ про́въ же и҆ а҆ндроні́къ: ѡ҆бличи́ша бо всѐ мꙋчи́телей безбо́жїе, вѣ́рою до́блественнѣ страда́льчествовавше.

І҆́косъ:

І҆и҃совы стрⷭ҇ти до́блественнѡ подража́вше, кꙋ́пнѡ съ тара́хомъ мꙋ́дрымъ про́въ же и҆ а҆ндроні́къ, ра́дꙋющесѧ пострада́ша на три́знищи, беззако́нныхъ ѡ҆блича́юще безбо́жїе. тѣ́мъ и҆ мы̀ любо́вїю чтꙋ́ще па́мѧть и҆́хъ, въ пѣ́снехъ похва́лимъ, и҆ вѣ́рнѡ по́двиги проповѣ́даемъ: ꙗ҆́кѡ ди́венъ бо гдⷭ҇ь, свѣти́льники въ мі́рѣ просла́вивъ сїѧ̑, вѣ́рою до́блественнѡ страда́льчествовавшыѧ.

Пѣ́снь з҃.

І҆рмо́съ:

Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ бж҃е ѻ҆тє́цъ на́шихъ.

Оу҆ше́съ ѿѧ́тїе претерпѣ́лъ є҆сѝ ра́дꙋѧсѧ, тара́хе сла́вне, ꙗ҆́кѡ бл҃гопослꙋшли́въ ра́бъ прикло́ншагѡ тебѣ̀ ᲂу҆́хо ми́лостивнѣйшее, и҆ моли̑твы твоѧ̑ соверши́вшагѡ, зовꙋ́ща: бл҃гослове́нъ є҆сѝ, бж҃е ѻ҆тє́цъ на́шихъ.

Протѧза́еми, мч҃ницы, и҆ мꙋ́ками ра́ними, тве́рдымъ смы́сломъ пребеззако́ннꙋющымъ сопроти́вистесѧ, и҆ побѣдоно́сцы бы́вше, пое́те: бл҃гослове́нъ є҆сѝ, бж҃е ѻ҆тє́цъ на́шихъ.

И҆спо́лнисѧ дꙋ́хъ тво́й бжⷭ҇твенныѧ росы̀ и҆ прохлажде́нїѧ, є҆гда̀ рꙋ́цѣ ѻ҆гне́мъ и҆ главꙋ̀ попалѧ́хꙋ тѝ, и҆ ꙗ҆́коже дѣ́ти взыва́лъ є҆сѝ, тара́хе: бл҃гослове́нъ є҆сѝ, бж҃е ѻ҆тє́цъ на́шихъ.

Кропле́нїемъ, ст҃і́и, честны́хъ крове́й ва́шихъ, пре́лести ᲂу҆́глїе погаси́сте, ро́сꙋ бжⷭ҇твенныѧ на́мъ и҆сточа́юще бл҃года́ти, и҆ и҆сцѣле́нїѧ пролива́ете во́ды, хва́лѧщымъ ва́шꙋ па́мѧть всегда̀.

Бг҃оро́диченъ:

И҆стощева́етсѧ во ᲂу҆тро́бꙋ твою̀, ѻ҆ч҃ескихъ нѣ́дръ не ѡ҆ста́вль соверше́ннѣйшее сло́во, и҆ пло́ть ви́дитсѧ, и҆ млⷣнцъ ражда́етсѧ. є҆мꙋ́же пое́мъ, дв҃о, ра́дꙋющесѧ: бл҃гослове́нъ є҆сѝ, бж҃е ѻ҆тє́цъ на́шихъ.

Пѣ́снь и҃.

І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Просвѣще́ни ꙗ҆́звами и҆ кра́сными добро́тами добротво́рнагѡ и҆ чꙋ́днагѡ страда́нїѧ, гдⷭ҇ꙋ предстоитѐ вѣнцено́сцы всѝ, свѣ́та та́мѡ сꙋ́щагѡ и҆спꙋща́ема бога́тнѡ и҆сполнѧ́еми, и҆ любо́вїю пою́ще непреста́ннѡ: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Въ себѣ̀ неи́стовѧсѧ пребезꙋ́мный мꙋчи́тель, ꙗ҆́кѡ побѣжде́нъ ва́шими противлє́нїи, вско́рѣ повелѣва́етъ ᲂу҆мори́ти мече́мъ ва́съ, содѣ́телю и҆ и҆зба́вителю пою́щыѧ: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Трⷪ҇цы побѡ́рницы, добропобѣ́днїи мꙋ́чєницы, и҆̀же безбо́жїѧ зи́мꙋ разо́рше теплото́ю вѣ́ры, вѣ́рныхъ предсто́лпїе, цвѣ́ти кра́снїи ᲂу҆́мнагѡ раѧ̀, приста̑нища сꙋ́щымъ въ бꙋ́ри, непрекло́ннїи столпѝ, а҆ндроні́къ, и҆ про́въ, и҆ тара́хъ почита́ютсѧ.

Бг҃оро́диченъ:

Со безпло́тными чи́нми, съ мч҃никъ во́инствы, со а҆пⷭ҇лы и҆ прⷪ҇рѡ́ки, всѝ всѣ́ми влады́чествꙋющꙋю тва́рьми влⷣчцꙋ, ꙗ҆́кѡ херꙋві̑мъ ст҃ѣ́йшꙋ, и҆ є҆ди́нꙋ бж҃їю чⷭ҇тꙋю мт҃рь благоче́стнѡ пое́мъ, хрⷭ҇та̀ превозносѧ́ще во всѧ̑ вѣ́ки.

Пѣ́снь ѳ҃.

І҆рмо́съ:

Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.

Возмого́ша тѣлесы̀ тлѣ́нными, нетлѣ̑нныѧ по́двиги пристѧжа́ти до́блественнїи, и҆ а҆́гг҃лѡмъ ᲂу҆подо́бишасѧ, црⷭ҇тво бж҃їе прїе́мше недви́жимое, про́въ, и҆ тара́хъ, и҆ а҆ндроні́къ, хрⷭ҇то́вы ᲂу҆гѡ́дницы.

Ꙗ҆ви́стесѧ ᲂу҆́глїе, ѻ҆гне́мъ невеще́ственнымъ та́инственнѣ вжига́еми, и҆ пожго́сте веще́ственнꙋю ле́сть великомꙋ́чєницы: и҆ возсїѧ́вше ꙗ҆́кѡ свѣ́тъ, тва́рь ѡ҆зарѧ́ете, и҆ спаса́ете ѿ страсте́й и҆ бѣ́дъ дꙋ́шы на́шѧ.

Дне́сь прино́ситъ пра́зднство лѣ́тнее свѣ́тлѡ и҆ ра́достнѡ це́рковь хрⷭ҇то́ва, бжⷭ҇твенное сїѐ ва́ше торжество̀: и҆ веселѧ́тсѧ съ ва́ми проро́цы, а҆пⷭ҇ли, и҆ всѝ мч҃ницы, страстоно́сцы, побѣди́тели великоимени́тїи.

Взѧ́стесѧ въ свѣтови̑днаѧ ра̑йскаѧ, страстоно́сцы, селє́нїѧ, ѡ҆дѣ́ѧвшесѧ свѣ́тлою ри́зою, ю҆́же и҆стка́сте многови́дными мꙋ́ками, и҆ престо́лꙋ предстоитѐ вседержи́телѧ, ѡ҆ всѣ́хъ прилѣ́жнѡ молѧ́щесѧ.

Бг҃оро́диченъ:

Пощади́ мѧ, сп҃се, рожде́йсѧ, и҆ сохрани́вый ро́ждшꙋю тѧ̀ нетлѣ́ннꙋ по рождествѣ̀: є҆гда̀ сѧ́деши сꙋди́ти всѧ̑ дѣла̀ моѧ̑, беззакѡ́нїѧ и҆ грѣхѝ моѧ̑ пре́зри, ꙗ҆́кѡ безгрѣ́шенъ, ми́лостивъ ꙗ҆́кѡ бг҃ъ и҆ чл҃вѣколю́бецъ.

Свѣти́ленъ.

Триплете́нный ли́къ страстоте́рпєцъ, тара́ха и҆ про́ва всѝ со а҆ндроні́комъ пѣ́сньми хва́льными ᲂу҆вѣнча́емъ: строга̑нїѧ бо претерпѣ́ша и҆ лю̑тыѧ ра̑ны и҆ болѣ̑зни и҆ со хрⷭ҇то́мъ црⷭ҇твꙋютъ.

Бг҃оро́диченъ:

Херꙋві̑мъ ꙗ҆ви́ласѧ є҆сѝ сла́внѣйши, и҆ серафі̑мъ показа́ласѧ є҆сѝ вы́шши, ꙗ҆́кѡ бг҃а ро́ждшаѧ воплоще́нна, земны̑мъ же показа́вшаго стєзѝ пра̑выѧ ше́ствовати ко спасе́нїю водѧ́щыѧ.